Zaburu 51 - ALA KA KUMA

Yafaɲini daalili

¹ Dɔnkililabagaw kuntigi ka dɔnkili. Dawuda ka dɔnkili dɔ.

² Dawuda tun benna kakalaya la ni Batiseba ye tuma min na, ni kira Natan nan'a fɛ o la, a ye dɔnkili nin labɛn o waati le la.

³ Ele Ala, e min ka ɲi, makari ne la. E ka ne ka hakɛ yafa e ka makari kama.

⁴ E ka ne ko ka n ka fili nɔgɔ bɔ n na pewu. Ne ka hakɛ yafa ne ma, ka n saniya.

⁵ Ne filila e ma, n be lɔ a la. Ne hakili be o la tuma bɛɛ.

⁶ Ne donna ele le gasi la, e kelenpe, ne ye kojugu kɛ e ɲakɔrɔ. O la, tiɲɛ bena sɔrɔ i fɛ i kuma waati la, jalakiyɔrɔ tena sɔrɔ i la i ka kiti la.

⁷ Ne ka kojugu be n joli la kabini n wolotuma, n bamuso ye n kɔnɔ ta ten fana.

⁸ I be tiɲɛ le fɛ adamaden fɛ. A to ne be koo lɔn kosɔbɛ.

⁹ E ka ne ka hakɛ yafa ka ne saniya. E ka ne ko, ne bena gwɛ parapara.

¹⁰ A kɛ ne nisɔn ka diya kosɔbɛ. E tun ye ne min halaki, a kɛ ne ka nisɔndiya.

¹¹ Kana ne ka fili filɛ tugu, ne ka cɛnni bɛɛ yafa.

¹² Dusuɲuman di ne ma, Ala, miiriɲuman di ne ma fana.

¹³ Kana ne bila ka to yɔrɔjan, kana e ka Nii bɔsi ne la.

¹⁴ A kɛ ne be nisɔndiya n ka kisiko la. Segi ka hakili ɲanaman di ne ma.

¹⁵ Ne bena murutibagaw kalan n'i ka sariyaw ye, o la, kojugukɛlaw bena sɔn i ta ma.

¹⁶ Ala, ne kisibaga Ala, mɔgɔfaga kunko bɔ ne kan, ne ka se k'i ka tilenninya fɔ ni nisɔndiya ye.

¹⁷ Matigi, daa di ne ma janko ne ka se k'i tanu.

¹⁸ E mako t'a la ne ka saraka bɔ i ye, e te saraka jɛnita fɛ.

¹⁹ Ala, e be saraka min fɛ kɔni, o ye ko adamaden k'a yɛrɛ majigi. Ala, min man'a yɛrɛ majigi tɛtɛtɛ, e te ban o tigi la fewu.

²⁰ E ka koɲuman kɛ *Siyɔn dugu ye. E ka kɛ sababu ye Zeruzalɛmu laminikogo ka lɔ.

²¹ O la, e bena sɔn saraka latigɛliw ma, minw ye saraka jɛnitaw ni saraka tɔw ye. O la, turaw bena kɛ sarakaw ye i ka sarakabɔyɔrɔ kan.