Zaburu 49 - ALA KA KUMA

Adamaden bololakolon le be taga a salon na

¹ Kore kɔmɔgɔw ka dɔnkili dɔ, dɔnkililabagaw kuntigi ye min la.

² Siyaw, aw bɛɛ ka nin lamɛn. Diɲɛ mɔgɔw, aw bɛɛ k'aw tulo malɔ,

³ mɔgɔbabaw fara mɔgɔ gwansanw kan, fɛntigiw ni fantanw.

⁴ N bena lɔnniyakuma fɔ, n kɔnɔnako kuntaga ka ɲi dɛ.

⁵ Ne be kolɔnbagaw ka talenw lamɛn. N bena u ka kuma fɔ ni gɔni ye.

⁶ Ne tena siran lonjugu la, hali ni n juguw kɛnin be ka n lamini.

⁷ U jigi b'u ka nafolo kan, u b'u yɛrɛ wanso u ka fɛntigiya kosɔn.

⁸ U te se k'u tɔɲɔgɔnw kunmabɔ Ala fɛ, u fana te se k'u nii sɔngɔ di Ala ma.

⁹ Mɔgɔ nii sɔngɔ ka gwɛlɛ haali, a te se ka sara fewu.

¹⁰ U bena to sii la kudayi wa? U tena sa wa?

¹¹ Kolɔnbagaw be sa, an ɲaa b'u la, nalomanw ni fatɔw be sa fana, an b'u ye. U bɛɛ be taga k'u ka nafolow to mɔgɔ wɛrɛw ye.

¹² U be miiri k'u ka soow bena to yen kudayi, k'u ka sigiyɔrɔw bena to yen waati ni waati, olu minw tun b'u tɔgɔ la u ka forow kan.

¹³ Ka adamaden to a ka dagamu la, a t'a lɔn ko ale sii man ca i ko begɛn ta.

¹⁴ Mɔgɔ minw lanin b'u yɛrɛ la ten, olu ta be laban ten. Minw b'a fɛ olu kaan ka mɛn, olu ta fana be ten.

¹⁵ U bena kɛ lahara kɔnɔ i ko sagaw. Saya le bena kɛ u dɛndɛbaga ye. Dɔɔni, u bena kɛ mɔgɔtilenninw seen kɔrɔ, u ka dawula be ban, lahara be kɛ u sigiyɔrɔ ye.

¹⁶ Nga Ala bena ne bɔsi lahara, a bena ne ta.

¹⁷ Kana i hakili ɲagami adamaden ka fɛntigiyako la. Kana i jigi tigɛ a ka soo kɔnɔ nafa cayako kosɔn.

¹⁸ Bari a te taga ni foyi ye a sawaati la, a te taga n'a ka nafolo ye.

¹⁹ K'a to nii na, a be se k'a fɔ ko ale dagamunin lo. N'a ka koo yiriwara, mɔgɔw ben'a tanu.

²⁰ O bɛɛ n'a ta, a bena ta'a faaw taayɔrɔ la. O yɔrɔ mɔgɔw tena yeelen ye tugu.

²¹ Ka adamaden to a ka dagamu la, n'a te koo faamu, a be i ko begɛn min be sa.