Zaburu 44 - ALA KA KUMA

Dɛmɛɲini daalili

¹ Dɔnkililabagaw kuntigi ka dɔnkili. Kore kɔmɔgɔw ka dɔnkili dɔ.

² Ala, i ye koo minw kɛ fɔlɔfɔlɔ an faaw ka tile la, an y'o mɛn. U y'o fɔ an ye.

³ E ye siya wɛrɛw gwɛn, ka sigiyɔrɔ di an faaw ma! E ye siya wɛrɛw halaki, u ka sɔrɔ ka sigi ka yɛrɛkɛ.

⁴ An faaw ye jamana nin minɛ, nga o ma kɛ u ka murujan sababu ye, o fana ma se sɔrɔ u ka fanga sababu la. E yɛrɛ ka sebagaya n'i ka fangatigiya nɔɔ lo, bari e tun be n'u ye, e ka kanuya kama.

⁵ Ele le ye ne ka Masa ye, n ka Ala, a to Isirayɛlidenw ka see sɔrɔ.

⁶ E barika la, an b'an juguw gwɛn. E tɔgɔ barika la, an b'an kɛlɛbagaw dɔndɔn.

⁷ Bari n jigi te n ka kala kan, n ka murujan tena n kisi.

⁸ Ele le b'an kisi an juguw ma, e b'a kɛ an kɔniyabagaw be maloya kosɔbɛ.

⁹ An be ele Ala boɲa loon o loon, an b'i tɔgɔ tanu tuma bɛɛ.

¹⁰ O bɛɛ n'a ta, Ala, e y'an bila kɔ. E y'a kɛ an maloyara kosɔbɛ. E te tagara n'an ka kɛlɛdenw ye kɛlɛ la tugu.

¹¹ E y'a kɛ an be bolila an juguw ɲa, an kɛlɛbagaw b'an ka minanw cɛra.

¹² E y'an di i ko sagaw, u be tagara ni minw ye fagayɔrɔ la. E y'a kɛ an jɛnsɛnna siya wɛrɛw cɛma.

¹³ E y'i ka jama feere dasu la, i ma tɔnɔ si sɔrɔ o la.

¹⁴ E y'a kɛ an sigiɲɔgɔnw b'an nɛnina. Minw b'an laminina, olu b'an lɔgɔbɔra.

¹⁵ E y'a kɛ siya wɛrɛw be talen lara n'an tɔgɔ ye. Jamanadenw be yɛlɛla an ma.

¹⁶ Dɔgɔyali le be ne ɲa loon o loon. Maloya ye n kungolo funu.

¹⁷ Tuma min na ne ye n tɔɔrɔbagaw ni n tɔgɔ cɛnbagaw kaan mɛn. U b'an darabɔ k'i nɛni.

¹⁸ O koo bɛɛ y'an sɔrɔ, k'a sɔrɔ an tun ma ɲinɛ e kɔ. An tun ma an ka bɛɛn cɛn fana.

¹⁹ An jigi ma bɔ e kan, an ma i ka sira bila.

²⁰ Nga e y'an halaki, an filɛ nin ye kongosogow ka yɔrɔ la. I y'an bila dibi juguman kɔnɔ.

²¹ N'a kɛra ko an le ɲinɛna an ka Ala kɔ, n'a kɛra ko an ye batofɛn wɛrɛ le daali,

²² ele Ala tun tena bɔ o kala ma wa? Ele min be adamaden kɔnɔnakow lɔn.

²³ E kosɔn, u be tile k'an faga, u b'an jati i ko saga fagataw.

²⁴ Matigi, wili! Mun na i te foyi kɛra do? Wili, kana an filinin to kudayi.

²⁵ Mun na e b'i yɛrɛ dogo? Mun na e ɲinɛna an ka sigɛn, n'an ka tɔɔrɔw kɔ?

²⁶ K'a sɔrɔ an benna buguri kɔnɔ, an lara tɛtɛtɛ duguma.

²⁷ Wili k'an dɛmɛ, an bɔsi e ka ɲumanya kosɔn.