Zaburu 42 - ALA KA KUMA

Tilanyɔrɔ filanan ( Dal 42—72 ) Adamaden mako be Ala la

¹ Dɔnkililabagaw kuntigi ka dɔnkili. Kore kɔmɔgɔw ka dɔnkili dɔ.

² Minan be hami jii nɔfɛ cogo min, ne mako be e la ten, Ala.

³ Ne mako be Ala la, Ala yɛrɛ la. Ne bena don a ka soo kɔnɔ tuma jumɛn ka lɔ a ɲafɛ?

⁴ Ɲaji le kɛra ne ka balo ye suu fara tile kan. Tuma o tuma, u b'a fɔ ne ye ko: «E ka Ala be min?»

⁵ Ne be n hakili jigi koo dɔ la, min tun ye n nii minɛ haali. Ne tun be taama na ni jama ye, ka taga Ala ka soo kɔnɔ. U tun be Ala tanura k'a waleɲuman lɔn, u tun be ɲanagwɛra kosɔbɛ.

⁶ Mun na ne jigi be tigɛ? Mun na ne be ŋunan ne yɛrɛ kosɔn? A ka fisa n ka n jigi la Ala kan, k'a tanu tugu. Ne kisibaga ni ne ka Ala lo.

⁷ Ne ka Ala, ne jigi tigɛra n yɛrɛ kosɔn. O le y'a to hali ka n to Zurudɛn baji mara la, hali ka n to Ɛrɛmɔn ni Miseyari kulu kan, ne be n hakili jigi i la.

⁸ E b'a kɛ jii be woyo ka mankan kɛ. Jikuruw be mankan kɛ k'a di ɲɔgɔn ma. E b'a kɛ u bɛɛ be tɛmɛ ne kan.

⁹ Masaba be koɲuman kɛ ne ye tilefɛ. Ne be dɔnkili la a ye suu bɛɛ la, ne be n nii dibaga Ala le daalila.

¹⁰ Ne b'a fɔra ne tangakabakuru Ala ye ko: «Mun na e ɲinɛna ne kɔ? Mun na ne be to dusukasi la ne jugu ka tɔɔrɔ kosɔn?

¹¹ Tuma o tuma, ni ne juguw y'a fɔ ne ye ko: ‹E ka Ala be min?›, o be ne fari faga.

¹² Mun na ne jigi be tigɛ? Mun na ne be ŋunan n yɛrɛ kosɔn? A ka fisa n ka n jigi la Ala kan k'a tanu tugu. Ne kisibaga ni ne ka Ala lo.»