Zaburu 40 - ALA KA KUMA

Masaba ka ɲumanya

¹ Dɔnkililabagaw kuntigi ka dɔnkili. Dawuda ka dɔnkili dɔ.

² Ne ye n jigi la Masaba kan kosɔbɛ. A y'a tulo malo ne fɛ, a ye n kasikan mɛn.

³ A ye ne sama ka n bɔ dingɛjugu kɔnɔ, a ye n bɔ pɔtɔpɔtɔ kɔnɔ. A ye n lɔ kabakuru kan, ka n taamacogo ɲa.

⁴ A y'a kɛ ne ye dɔnkilikura l'a ye, an ka Ala tanu dɔnkili. Mɔgɔ caaman bena o mɛn, u bena siran Masaba ɲa, ani k'u jigi la a kan.

⁵ Mɔgɔ min y'a jigi la Masaba kan, n'a hakili te yɛlɛma dabayakumatigiw fɛ, n'a fana te mɛnni kɛ galontigɛlaw fɛ, o tigi dagamunin lo.

⁶ U cayara Masaba ne ka Ala, i ka kabako n'i ka kolatigɛninw cayara an faan fɛ. Foyi te ele bɔ. Ne b'a fɛ k'u koo fɔ, nga ne te se, bari u cayara kojugu, n te se k'u bɛɛ koo fɔ.

⁷ E te saraka, walima sɔnnifɛn wɛrɛ fɛ. I y'o fɔ ka gwɛya n ye. E ma saraka jɛnita ɲini, e ma hakɛ yafa saraka ɲini fana.

⁸ O la, ne ko: «N natɔ filɛ nin ye. N koo fɔra sɛbɛn min kɔnɔ, o be n fɛ.»

⁹ Ne ka Ala, k'i sago kɛ, o le ka di ne ye. Ne be n hakili to i ka sariyaw la tuma bɛɛ.

¹⁰ Ne b'i ka kisili kibaru diman fɔ jamaba cɛma. E ɲaa b'a la ne ma je dɛ. Masaba, i b'o kala ma.

¹¹ Ne m'i ka kotilenninw to n kɔnɔ. Kisili min be sɔrɔ i fɛ, ne y'o koo fɔ, n fana y'i ka kantigiya koo fɔ. Ne m'i ka ɲumanya n'i ka tiɲɛ munumunu, n m'a munumunu jamaba ɲana.

¹² Masaba, kan'a to i ka makari ka ban ne faan fɛ. E ka ɲumanya n'i ka tiɲɛka ne tanga tuma bɛɛ.

*

¹³ Kojugu caaman be ne lamini, daan t'o la. Ne ka filiko kunko be ne kan, ne te yeli kɛra tugu. U ka ca ni n kunsigi ye, ne jigi tigɛra.

¹⁴ Masaba, sabali ka ne kisi, na joona ka ne dɛmɛ.

¹⁵ Mɔgɔ minw b'a fɛ ka ne faga, olu ka maloya ka lɛɛbu. Minw b'a fɛ ne mako be sa, olu kuun surunin ka kɔsegi.

¹⁶ Mɔgɔ minw be yɛlɛ ne ma haahaa, olu nina ka ban maloyakojugu bolo.

¹⁷ A to e ɲinibagaw bɛɛ ka nisɔndiya, a to u ka yɛlɛ i kosɔn. Minw b'a fɛ i k'u kisi, a to olu k'a fɔ waati bɛɛ la ko: «Masaba ka bon.»

¹⁸ Ne ye fantan sigɛnbagatɔ ye. Nga Matigi hakili be ne la. Ele le ye ne dɛmɛbaga ni ne bɔsibaga ye. Ne ka Ala, kana mɛn k'o kɛ.