Zaburu 4 - ALA KA KUMA

Wulafɛ daalili

¹ Dɔnkililabagaw kuntigi ka dɔnkili. Dawuda ka dɔnkili dɔ. Fɔlikɛminan jurulamanw le be fɔ a latuma na.

² Ne ka Ala, e min tilennin lo, ni ne y'i daali, e ka ne jaabi. Ka ne to dusukasi la, e ye ne jigi tugu. Makari ne la, ne ka daalili lamɛn.

³ Adamadenw, aw bena ne dɔgɔyali dabila tuma jumɛn? Aw bena kuma gwansan fɔli ni galontigɛ dabila tuma jumɛn?

⁴ Aw k'a lɔn ko Masaba be mɔgɔtilennin lɔn. Ni ne b'a daali, a be mɛnni kɛ ne fɛ.

⁵ N'aw dimina, aw kana hakɛ kɛ. K'aw to dilan kan, aw ka miiri. Aw ka miiri kosɔbɛ ka to yɔrɔ kelen.

⁶ Aw ka saraka daganinw bɔ, aw k'aw jigi la Masaba kan.

⁷ Mɔgɔ caaman b'a fɔ ko: «Jɔn bena hɛrɛ kɛ anw ye?» Masaba, e ka yeelen bɔ an ye.

⁸ Tuma min na suman ni duvɛnkɛnɛ ka ca u fɛ, u nisɔn ka di kosɔbɛ, nga e be ne nisɔn diya ka tɛmɛ o kan.

⁹ Ne latɔ, ne be sinɔgɔ hɛrɛ la. Ne be to lafiya la e Masaba kelen sababu la.