Zaburu 39 - ALA KA KUMA

Adamaden sii man jan

¹ Dɔnkililabagaw kuntigi ni Yedutun ka dɔnkili. Dawuda ka dɔnkili dɔ.

² Ne tun ko: «Ne bena n kumacogo kɔlɔsi janko n kana fili. Ni mɔgɔjugu be ne ɲafɛ, ne be je.

³ Ne jera, ne ma foyi fɔ, foyi te n daa k'a fɔ. O bɛɛ n'a ta, ne ka sigɛn be tagara ɲa.

⁴ Ne kɔnɔ tun gwanna papapa, n ninakili bɛɛ tun be n jɛnina i ko tasuma. O le y'a to ne kumana.

⁵ Masaba, a to ne ka n sii laban waati lɔn. Tiɲɛ na, ne sii tora tile joli sa? N ka se ka n sii surunya lɔn.

⁶ E y'a to n sii surunyana, ne sii te foyi ye i fɛ. Tiɲɛ na, adamaden ni fɔɲɔ ka kan.

⁷ Tiɲɛ na, adamaden be taga ka na i ko suma. A b'o kɛra, nga o bɛɛ ye fuu ye. A be fɛɛnw ɲini k'o kɛ ɲɔgɔn kan, nga a t'a lɔn tigi min yɛrɛ bena o ta.

⁸ Matigi, ne ka kan ka n jigi la mun le kan sisan? Ne jigi be ele le kan.

⁹ Ne bɔ n ka filiw bɛɛ la. E kan'a to nalomanw ka ne dɔgɔya.

¹⁰ N jera, ne tena kuma tugu, bari ele le y'a to o koo ye ne sɔrɔ.

¹¹ Kana ne gosi tugu, e ka bolokuru ye ne barika ban.

¹² E be adamaden ɲaa gwan a ka filiko la. Fɛɛn min ka d'a ye, i b'o cɛn i ko bagabaga. Tiɲɛ na, adamadenw bɛɛ ye fuu le ye.

¹³ Masaba, ne ka daalili mɛn, i tulo malɔ ne kasikan na, e kana i ɲaa tugu ne kasitɔ ma. Bari ne ye lonan ye i fɛ, ne ye waati dɔɔni kɛbaga dama le ye i ko ne faaw.

¹⁴ A to ne be lafiɲɛ dɔɔni janko ne ɲada ka diya sanni n ka tunu pewu.»