Zaburu 37 - ALA KA KUMA

Mɔgɔjugu ni mɔgɔtilennin labancogo

1 Dawuda ka dɔnkili dɔ.

¹ Dawuda ka dɔnkili dɔ. E kana dimi kokolonkɛbaga kosɔn, kojugukɛla keleya kana e minɛ.

² U be nagasi joona ka ja i ko biin, u be ja i ko binkɛnɛ.

³ Ele k'i jigi la Masaba kan ka baaraɲuman kɛ, i bena to jamana kɔnɔ hɛrɛ la.

⁴ E ka Masaba koo diya e yɛrɛ ye kosɔbɛ, e mako be fɛɛn minw na, a bena o d'i ma.

⁵ I k'i ka koo to Masaba bolo, e k'i jigi la a kan, a bena o ɲanabɔ.

⁶ E ka tilenninya bena ye Masaba barika la i ko dugugwɛda kɛnɛ. A bena manamana i ko tile, a gwan tuma na.

⁷ I hakili sigi Masaba ɲakɔrɔ, ka kɔnɔni kɛ a fɛ. Mɔgɔ min ka koo be ɲa, i kana dimi o kɔrɔ. I kana dimi kojugukɛla kɔrɔ.

⁸ I ka dimi dabila, e dusu kana bɔ. I kana dimi, o bena kɛ kojugu ye.

⁹ Bari mɔgɔjugu niin bena bɔ yen. Mɔgɔ min jigi be Masaba kan, o tigi bena jamana tigiya kɛ.

¹⁰ Yanni dɔɔni, mɔgɔjugu bena tunu. E ben'a ɲini, i ten'a ye tugu.

¹¹ Mɔgɔmajigininw bena jamana nin tigiya kɛ, u bena hɛrɛ dafanin sɔrɔ.

¹² Mɔgɔjugu be ŋaniyajugu ta mɔgɔtilennin kama, a b'a ɲiin ɲimi a kama.

¹³ Matigi be yɛlɛ a ma, bari Matigi ɲaa b'a ka tɔɔrɔlon nata la.

¹⁴ Mɔgɔjuguw be murujan bɔ, u b'u ka kalaw labɛn, janko ka dɛsɛbagatɔ ni fantan halaki, ani ka mɔgɔtilenninw kaan tigɛ.

¹⁵ U ka muru bena don u yɛrɛ la, u ka kalaw bena kari.

¹⁶ Mɔgɔtilennin ka fɛɛn fitini sɔrɔ, o ka fisa ni mɔgɔjuguw ka sɔrɔ caaman ye.

¹⁷ Bari mɔgɔjuguw fanga bena ban, nga Masaba bena mɔgɔtilenninw dɛmɛ.

¹⁸ Masaba be janto mɔgɔtilennin la, a ta be to yen kudayi.

¹⁹ U tena maloya gwɛlɛyatuma na. Kɔngɔ waati la, u be fa.

²⁰ Mɔgɔjuguw bena halaki. Matigi juguw bena ja i ko feerenw, u bena tunu i ko sisi.

²¹ Mɔgɔjugu be juru ta, a t'a sara. Mɔgɔtilennin be makari, a be sɔnni kɛ.

²² Ala ye mɔgɔ minw ta ɲa, olu le bena jamana nin tigiya kɛ. N'a ye minw ta cɛn, olu kɔni be halaki pewu.

²³ Mɔgɔ min ka kɛwaliw ka di Masaba ye, a b'o tigi taamacogo sabati.

²⁴ N'o tigi benna, a te to yen, bari Masaba b'a dɛmɛna.

²⁵ Ne tun ye kanbelen ye, n kɔrɔla sisan, nga n ma mɔgɔtilennin filinin ye kɔfɛ, n fana m'a ye n'a kɔmɔgɔ b'a daladumuni daali.

²⁶ Mɔgɔtilennin be makari tuma bɛɛ, a be juru don. A deenw b'o tɔnɔ sɔrɔ.

²⁷ N'i y'i yɛrɛ kɔlɔsi kojugu ma, ka koɲuman kɛ, e bena to i ka jamana kɔnɔ.

²⁸ Bari kotilennin le ka di Masaba ye, a t'a ka mɔgɔtilenninw to ten. A b'u mara tuma bɛɛ, nga mɔgɔjugu deenw be tunu bugubugu.

²⁹ Mɔgɔtilenninw le bena jamana nin tigiya kɛ, u bena to yen kudayi.

³⁰ Lɔnniyakuma le be bɔ mɔgɔtilennin daa la. Ale lo be se ka kumatilennin fɔ.

³¹ A ka Ala ka sariya koo b'a dusu la, a fana tena fili.

³² Mɔgɔjugu be mɔgɔtilennin dɛndɛ, a b'a fɛ k'a faga,

³³ nga Masaba t'a don a bolo. Ni mɔgɔtilennin ka kan ka kiti, Masaba b'a dɛmɛ, u t'a jalaki.

³⁴ E jigi la Masaba kan k'a ka fɔta bato, a bena i boɲa ka jamana nin tigiya d'i ma. E bena mɔgɔjuguw ye, u be tunu ka bɔ yen.

³⁵ Ne ye mɔgɔjugu ye n'a be siranya bilara mɔgɔw la. A tun ka bon i ko Liban yiribaw.

³⁶ Nga a tɛmɛna, a ma ye tugu. Ne y'a yɔrɔ ɲini ka dɛsɛ.

³⁷ E ka mɔgɔɲuman kɔlɔsi, e ka hɔrɔn filɛ kosɔbɛ. Hɛrɛmɔgɔ ka sini bena ɲa.

³⁸ Nga kojugukɛlaw bɛɛ bena halaki ka bɔ yen, mɔgɔjuguw tena sini sɔrɔ.

³⁹ Masaba le ye mɔgɔtilenninw kisibaga ye. A kɛra u dogoyɔrɔ ye dusukasi waati la.

⁴⁰ Masaba b'u dɛmɛ k'u bɔsi. A b'u bɔsi mɔgɔjuguw bolo k'u kisi, bari u y'u yɛrɛ kalifa a ma.