Zaburu 36 - ALA KA KUMA

Masaba ka ɲumanya

¹ Dɔnkililabagaw kuntigi ka dɔnkili. Masaba ka baarakɛla Dawuda ka dɔnkili dɔ.

² Ne be to ka mɔgɔjugu ka murutikuma jati minɛ. A ko kuun t'a la ka siran Ala ɲa.

³ Nga a b'a yɛrɛ nigɛra le fɔɔ a t'a yɛrɛ ka fili ye, o koo fana te goy'a ye.

⁴ A be koo minw fɔ, olu bɛɛ ye galon ni namara ye. Kuun te koɲuman kɛ la ale fɛ.

⁵ Hali k'a to a ka dilan kan, a be kodagabali le miiri. A be sirajugu kan, a te ban kojugu la.

⁶ Masaba, e ka ɲumanya ka bon i ko sankolo. E ka kantigiya be ye fɔɔ sankaba kɔnɔ.

⁷ E ka tilenninya be i ko kulu barikaman. E ka kolatigɛnin ka dun i ko jiba. Masaba, ele le ye adamadenw ni begɛnw dɛmɛbaga ye.

⁸ E ka ɲumanya ka bon. Adamaden b'a yɛrɛ sutara e suma kɔrɔ.

⁹ E b'u wasa n'i ka soo kɔnɔ nafamanfɛnw ye. E ka koɲuman be woyora i ko kɔɔ, u faan fɛ.

¹⁰ Bari mɔgɔ be nii na ele le sababu la, an be faamuli sɔrɔ e ka yeelen le barika la.

¹¹ I k'i ka ɲumanya kɛ i lɔnbagaw ye. I ka tilenninya ka to dusuɲumantigiw fɛ.

¹² E kan'a to yɛrɛboɲabaga be se n ma, n kana boli mɔgɔjugu ɲa.

¹³ Mɔgɔjuguw benyɔrɔ filɛ. U be ben, u te se ka wili tugu.