Zaburu 33 - ALA KA KUMA

Danbaga ni kisibaga Ala ka tanu

¹ Mɔgɔtilenninw, aw ka nisɔndiyadɔnkiliw la Masaba kosɔn. A tanuli ka ɲi mɔgɔɲumanw daa la.

² Aw ka Masaba bato ni gɔni ye, aw ka gɔni juru tan fɔ k'a tanu.

³ Aw ka dɔnkilikura la a ye, aw ka fɔli kɛ ka ɲa kosɔbɛ k'a tanu.

⁴ Masaba ka fɔta tilennin lo. A ka kɛwaliw bɛɛ be kɛ ka ɲa ni kantigiya ye.

⁵ Kotilennin ni kogwɛnin le ka di Masaba ye. A ka ɲumanya be diɲɛ fa.

⁶ Masaba ye sankolo dan a ka kuma le barika la. A y'a kɔnɔnafɛnw bɛɛ dan a dafɔɲɔ barika la.

⁷ A ye kɔgɔji lajɛn yɔrɔ kelen na, a ye jibabaw kɛ dingɛ kɔnɔ.

⁸ Dugukolo kan fɛɛnw bɛɛ ka siran Masaba ɲa. Diɲɛ kɔnɔ nimanfɛnw bɛɛ ka yɛrɛyɛrɛ a ɲakɔrɔ.

⁹ Bari a ka fɔta be kɛ wajibi, a fɔtɔ, a kɛtɔ.

¹⁰ Masaba be siya wɛrɛw ka koo labɛnnin yɛlɛma, a b'u ka kolatigɛninw cɛn.

¹¹ Masaba ta kɔni be yen kudayi. A ka kolatigɛninw be to yen fɔɔ waati bɛɛ.

¹² Masaba ye siya min ka Ala ye, o siya nin dagamuna. A ye jama min woloma k'a kɛ a ta ye, o fana dagamuna.

¹³ K'a to sankolo kɔnɔ, a ɲaa be adamadenw bɛɛ la.

¹⁴ Hali k'a to a sigiyɔrɔ la dɛ, a ɲaa be dugukolo kan mɔgɔw bɛɛ la.

¹⁵ Ale lo ye miiricogo d'u bɛɛ ma. A ɲaa b'u ka kɛwaliw bɛɛ la.

¹⁶ Masacɛ si te yen min be kisi kɛlɛden caaman sababu la. Cɛfari fana te kisi a ka fanga boɲa kosɔn.

¹⁷ Kɛlɛkɛyɔrɔ la, soo kɔni ye jigisigifɛn dama le ye, a seko te mɔgɔ kisi.

¹⁸ Mɔgɔ minw be siran Masaba ɲa, a be olu mara. Mɔgɔ minw jigi b'a ka ɲumanya kan, a be olu dɛmɛ.

¹⁹ A be olu kisi saya ma, u ka se ka to nii na kɔngɔ waati la.

²⁰ An jigi be Masaba kan, an dɛmɛbaga n'an tangabaga lo.

²¹ An be nisɔndiya ale lo sababu la, bari an jigi be ale lo kan.

²² Masaba, ɲa an ma, i ko an jigi b'i kan cogo min na.