Zaburu 32 - ALA KA KUMA

Dagamu min be sɔrɔ yafali kɔ

1 Dawuda ka dɔnkili dɔ.

¹ Dawuda ka dɔnkili dɔ. Mɔgɔ min ka fili t'a kan tugu, n'a ka hakɛ yafara, o tigi dagamunin lo.

² Masaba ti mɔgɔ min ka filiko jati tugu, n'a tigi fana te namara kɛ tugu, o tigi dagamunin lo.

³ Tuma min na ne tun yi n daa tugu n ka kojugu kan, ne barika tun be banna ŋunankojugu fɛ.

⁴ E tun be ne tɔɔrɔ suu fara tile kan. O la, ne barika tun be banna i ko tilemanayiri.

⁵ Ne kɔni ma n ka fili dogo, ne ye n ka kojugu fɔ i ye. Ne y'a fɔ ko: «Ne bena n ka kojugu fɔ Matigi ye.» E ye ne ka kojugu kunko bɔ ne kan.

⁶ A ka ɲi e ɲasiranbagaw bɛɛ k'i daali waatiɲuman na. O la, hali ni gwɛlɛya nana cogo o cogo, a te se u ma.

⁷ Ele le ye ne dogoyɔrɔ ye, e be ne tanga dusukasi ma. Ne bena n bɔsiko dɔnkili la bari i be ne tanga.

⁸ Masaba ko: «Ne bena i kalan, k'i ka tɛmɛyɔrɔ yira i la. Ne bena i ladi, ne ɲaa tena bɔ i kan.»

⁹ Kana kɛ hakilitan ye i ko soo, walima sofali. U be karafe ni dajuru don minw na k'u mara, janko u ka kolo u ye.

¹⁰ Sigɛn caaman ye mɔgɔjugu ta ye, nga mɔgɔ min y'a yɛrɛ kalifa Masaba ma, a b'a ka ɲumanya kɛ o tigi ye.

¹¹ Mɔgɔtilenninw, aw ka nisɔndiya Masaba kosɔn, aw ka ɲanagwɛ ka nisɔndiyapɛrɛnkan bɔ.