Zaburu 31 - ALA KA KUMA

Masaba ye ne tangabaga ye

¹ Dɔnkililabagaw kuntigi ka dɔnkili. Dawuda ka dɔnkili dɔ.

² Masaba, ne ye n yɛrɛ kalifa e ma, kan'a to ne be maloya fewu. Ne bɔsi e ka tilenninya kosɔn.

³ Mɛnni kɛ ne fɛ, ne bɔsi joona. Kɛ ne tangakabakuru ni ne dogoyɔrɔ ye, ne kisi.

⁴ Ele le ye ne tangakabakuru ni ne dogoyɔrɔ ye, ne bila sira ka sira yira ne la, e tɔgɔ kosɔn.

⁵ Ne bɔ jaan na u ye min la ne kama, bari ele le ye ne tangabaga ye.

⁶ Ne be n nii segi i ma. Ele Masa Ala tiɲɛtigi ye ne hɔrɔnya.

⁷ Josɔnbagaw koo man di ne ye. Ne be n yɛrɛ kalifa e ma, Masaba.

⁸ Ne b'a fɛ ka nisɔndiya ka pɛrɛn i ka ɲumanya kosɔn. Bari e ɲaa be n ka sigɛn na, e be n ka dusukasi lɔn.

⁹ E ma sɔn n jugu ka se n kɔrɔ. E sababu la, n sera ka lɔ seen kan. Ele le ye n hɔrɔnya.

¹⁰ Masaba, e ka makari ne la, bari ne dusu kasinin lo. Dusukasi bolo, n ɲaa cɛnna, n fari cogo yɛlɛmana, n hakili ɲagamina.

¹¹ Ne sii be banna dusukasi bolo, ne be n saan bɛɛ kɛ ŋunan na. Ne barika be banna n ka kojugu kosɔn, ne kolow halakira.

¹² Ne juguw bɛɛ be ne lɔgɔbɔ, n sigiɲɔgɔnw fana b'o ɲɔgɔn kɛ n na. N lɔnbagaw be siran n ɲa. N'u ye n kunbɛn sira kan, u be boli ka dogo n ɲa.

¹³ U be ɲinɛ ne kɔ i ko mɔgɔ min sara, ne kɛra i ko minan cɛnnin.

¹⁴ N tulo be mɔgɔw ka kumajuguw la, siranyakow be faan bɛɛ la. U be ɲɔgɔn lajɛnna ne kama, u be ne fagako janfa sirila.

¹⁵ Nga ne be n yɛrɛ kalifa ele Masaba ma. Ne ko: «I ye ne ka Ala ye.»

¹⁶ Ne ka koo b'i bolo, ne bɔsi n juguw ni n tɔɔrɔbagaw bolo.

¹⁷ E ka ɲumanya kɛ i ka baarakɛla ye. Ne kisi i ka kanuya kosɔn.

¹⁸ Masaba, e kana ne maloya e daalituma na ne fɛ. Mɔgɔjuguw maloya, a to u kana se ka foyi fɔ, fɔɔ u ka taga se lahara.

¹⁹ Galontigɛla nunu kɛ bobow ye, olu minw be dabayakuma fɔ mɔgɔtilennin ma. U b'u yɛrɛ boɲa n'a ye, u b'a dɔgɔya fana.

²⁰ E ka ɲumanya ka bon kosɔbɛ, e b'o kɛ i ɲasiranbagaw ye. Mɔgɔ minw be dogo i fɛ, i b'i ka ɲumanya kɛ o tigiw ye diɲɛ mɔgɔw ɲana.

²¹ I b'o tigilamɔgɔw dogo e yɛrɛ fɛ, i b'u yɔrɔ jaɲa adamadenw ka namarakow la. I b'u dogo yɔrɔ dɔ la, k'u tanga dajuguw ma.

²² I ni ce, Masaba, e y'i ka ɲumanya yira ne la, ne min tun be i ko dugu datugunin.

²³ Ne hakili tun ɲagamina fɔɔ ne ko: «Ne gwɛnna ka bɔ i kɔrɔ.» Nga ne y'i daali tuma min na, i ye ne kaan mɛn.

²⁴ Aw minw sɔnna Masaba ta ma, aw k'a koo diya aw yɛrɛ ye. Mɔgɔ minw lar'a la, a b'o tigiw mara. A bi yɛrɛboɲabagaw ɲaa gwan kosɔbɛ.

²⁵ Aw minw bɛɛ jigi be Masaba kan, aw ka barika don aw yɛrɛ la, k'aw jaa gwɛlɛya.