Zaburu 30 - ALA KA KUMA

Matigi le b'a kɛ mɔgɔw be to nii na

¹ Dɔnkili min be la Alabatoso kalifalon na. Dawuda ka dɔnkili dɔ.

² Masaba, ne b'i tanu, bari, e ye ne kuun kɔrɔta tugu, e ma sɔn ne juguw ka nisɔndiya ne kosɔn.

³ Masaba ne ka Ala, ne kasira e kɔ, i ye ne kɛnɛya.

⁴ Masaba, e y'a kɛ ne kɔsegira ka bɔ lahara ka na. I ye sii di ne ma ka ne bɔ kaburu kɔnɔ mɔgɔw cɛma.

⁵ Aw minw ye Masaba ka mɔgɔw ye, aw k'a tanu ni dɔnkiliw ye. Aw k'a bato k'a ka senuya koo fɔ.

⁶ Bari, a ka dimi te mɛn, a be ɲumanya kɛ tuma bɛɛ. Sufɛ be kɛ kasi ye, sɔgɔma be kɛ nisɔndiya ye.

⁷ N ɲasumawaati la, n y'a fɔ ko: «Foyi tena ne sɔrɔ tugu.

⁸ Masaba, e tun ye ne dɛmɛ, ne ye see sɔrɔ kosɔbɛ.» Nga e nana e yɛrɛ dogo, hakiliɲagami ye ne sɔrɔ.

⁹ Masaba, ne kasira e kɔ, ne ye ele Matigi daali kosɔbɛ.

¹⁰ Ne ka sa ka don kaburu kɔnɔ, o be mun le ɲa? Buguri be se k'i tanu wa? Buguri be se k'i ka ɲumanya ko fɔ wa?

¹¹ Masaba, mɛnni kɛ ne fɛ, makari ne la. Masaba, ne dɛmɛ.

¹² I ye ne ka dusukasi yɛlɛma k'a kɛ nisɔndiya dɔɔn ye. I y'a kɛ ne ye dusukasifani bɔ ka ɲanagwɛ ta don.

¹³ E y'o kɛ janko ne k'i tanu kosɔbɛ, ne tena o dabila. Masaba ne ka Ala, ne bena barika la e ye tuma bɛɛ.