Zaburu 28 - ALA KA KUMA

Dɛmɛɲini daalili

1 Dawuda ka dɔnkili dɔ.

¹ Dawuda ka dɔnkili dɔ. Masaba, ne be kasira ele le kɔ. Ele le ye ne tangakabakuru ye fɔɔ e ka ne lamɛn. N'o tɛ kɔni, ne ni lahara taabagaw bena kɛ kelen ye.

² Ni ne y'i daali, ni ne ye n bolow wili e ka sigiyɔrɔ faan na, e ka ne lamɛn.

³ Kana ne minɛ mɔgɔjuguw minɛcogo la, minw b'a fɔ u tɔɲɔgɔnw ye ko hɛrɛ le be yen, k'a sɔrɔ kojugu lo b'u kɔnɔ.

⁴ U ka kɛwaliw ɲɔgɔn kɛ u la, u ka kojuguw ɲɔgɔn kɛ u la. U minɛ i ko u y'u mɔgɔɲɔgɔnw minɛ cogo min na. A kɛ u ka kojugu ka kɔsegi u yɛrɛ kan.

⁵ U kɔni te Masaba ka kɛta jati, u mako t'a ka baara la. U halaki Masaba, kan'a to u be segi ka wili tugu.

⁶ Masaba ka tanu, bari a ye ne ka daalili lamɛn.

⁷ Masaba le be fanga di ne ma ka n tanga fana. Ne ye n yɛrɛ kalifa a ma, a ye n dɛmɛ. Ne nisɔn ka di kosɔbɛ, ne b'a tanu ni dɔnkili ye.

⁸ Ale lo be fanga di a ka jama ma. A ka mɔgɔwolomanin dogoyɔrɔ n'a kisiyɔrɔ lo.

⁹ Masaba, e ka jama kisi, ka barika don u la. Kɛ u marabaga ye, k'u dɛmɛ tuma bɛɛ la.