Zaburu 27 - ALA KA KUMA

Tanuli ni jigilali Masaba kan

1 Dawuda ka dɔnkili dɔ.

¹ Dawuda ka dɔnkili dɔ. Masaba le be yeelen bɔ ne ye ani ka n kisi, ne bena siran jɔn le ɲa? Masaba le ye ne tangabaga ye, ne jaa bena tigɛ jɔn le ɲa?

² Ni kojugukɛlaw wilila ne kama k'u be ne faga, u be talon ka ben.

³ Hali ni kɛlɛbolo le nana ne kama, hali ni kɛlɛ wilila ne kama, ne tena siran foyi ɲa, ne jigi te tigɛ.

⁴ Ne be min ɲini Masaba fɛ, n be fɛɛn min fɛ sɔbɛ sɔbɛ la. O ye ne ka to a fɛ n sii bɛɛ la, n ka se k'a ka ɲumanya ye, ani ka ladili ɲini a fɛ.

⁵ Bari a bena ne mara a ka sigiyɔrɔ la gwɛlɛya waati la, o yɔrɔ le bena kɛ ne dogoyɔrɔ ye. A bena ne bila sanfɛ kabakuru kan.

⁶ Hali sisan yɛrɛ, ne kuun kɔrɔtanin lo. A tɛmɛna n juguw ta kan, minw be n laminina. Ne kɔni bena saraka bɔ Masaba ka soo kɔnɔ ni nisɔndiyapɛrɛnkan ye. Ne ben'a tanu ka dɔnkili la a ye.

⁷ Masaba, mɛnni kɛ ne ka daalili la, makari ne la ka ne jaabi.

⁸ E ye min fɔ, ne be miiri o le la, e ko: «Aw ka ne yɔrɔ ɲini.» Ne b'i yɔrɔ ɲinina, Masaba.

⁹ Kana i yɛrɛ dogo ne la, kana sɔn k'i ka baaraden gwɛn ni dimi ye. Ele le ye ne dɛmɛbaga ye, ele min ye ne kisibaga Ala ye, kana ne bila ka n to yen.

¹⁰ Hali ni ne faa ni ne baa be sɔn ka ban ne la, Masaba be ne ladon a yɛrɛ fɛ.

¹¹ Masaba, e b'a fɛ ne ka sira min ta, o sira nin yira ne la. Ne bila siraɲuman kan ne juguw kosɔn.

¹² Kana ne kɛ n juguw sago ye. Seerejuguw be wilila ne kama, u be juguman dama le kan.

¹³ Ni ne tun ma la Masaba ka ɲumanya la sɔbɛ la ka ne to diɲɛ na, ne tun bena kɛ di?

¹⁴ I jigi la Masaba kan, i jija k'i jaa gwɛlɛya. I jigi la Masaba kan.