Zaburu 25 - ALA KA KUMA

Masacɛ b'a fɛ ka Ala sago lɔn

1 Dawuda ka dɔnkili dɔ.

¹ Dawuda ka dɔnkili dɔ. Ne ɲaa sinnin be ele Masaba le ma.

² Ne ka Ala, ne ye n jigi la ele le kan, kan'a to ne be maloya, kan'a to n juguw be yɛlɛ n la.

³ Mɔgɔ minw jigi b'i kan, olu si tena maloya. E janfabagaw ta lo ye maloya ye.

⁴ Masaba, ne ka kan ka sira min ta, o yira ne la. I sago yira ne la.

⁵ A to ne be taama tiɲɛsira kan, i ka ne kalan. Bari e le ye ne kisibaga Ala ye. Ne jigi be ele le kan loon bɛɛ.

⁶ Masaba, e k'i hakili to e ka ɲumanya n'i ka makari la, bari o ye tuma bɛɛ koo le ye.

⁷ Masaba, kana i hakili to ne ka kanbelenya waati kojuguw ani ne ka murutikow la. E hakili to ne la ka kɛɲɛ n'i ka ɲumanya n'i ka kanuya ye.

⁸ Masaba ka ɲi, a tilennin lo fana. O la, a be tɛmɛsira yira kojugukɛlaw la.

⁹ A be mɔgɔmajigininw ka tiɲɛ d'u ma, a b'a sago yira u la.

¹⁰ Masaba ka siraw ye ɲumanya ni tilenninya ye a ka bɛɛn n'a ka fɔtaw batobagaw fɛ.

¹¹ Masaba, yafa ne ma e tɔgɔ boɲa kosɔn, bari ne ka kojugu ka ca haali.

¹² Mɔgɔ min be siran Masaba ɲa, o tigi ka kan ka sira min ta, Masaba b'o yira a la.

¹³ A fana bena to hɛrɛ la, dugukolo bena kɛ a kɔmɔgɔw ta ye.

¹⁴ Masaba b'a ka kodogonin yira a ɲasiranbagaw la, a b'a ka bɛɛn musaga yira u la.

¹⁵ Ne jigi be Masaba le kan tuma bɛɛ, bari ale lo be ne seenw bɔ jaan na.

¹⁶ Ne filɛ, makari ne la, bari n kelen lo, n be tɔɔrɔ la fana.

¹⁷ Ne dusu kasinin lo kosɔbɛ, ne bɔsi ne ka dusukasi la.

¹⁸ Ne ka sɛgɛn ni ne ka tɔɔrɔ filɛ, ne ka kojugu bɛɛ yafa.

¹⁹ A filɛ, ne juguw ka ca cogo min na. A filɛ, u be n kɔniya cogo min na.

²⁰ Ne tanga, ne kisi. Ne ye n jigi la e kan, e kan'a to ne be maloya!

²¹ Ne jigi be ele le kan, ne mara tilenninya ni ɲumanya la.

²² Ee, Ala! Isirayɛlidenw bɔsi u ka gwɛlɛyaw bɛɛ la.