Zaburu 21 - ALA KA KUMA

Masacɛ jigi ye Ala ye

¹ Dɔnkililabagaw kuntigi ka dɔnkili. Dawuda ka dɔnkili dɔ.

² Masaba, masacɛ be nisɔndiya i ka sebagaya kosɔn. Ni e y'a kisi, o be kɛ nisɔndiya ye a ma kosɔbɛ.

³ A tun be fɛɛn min fɛ, i y'o d'a ma. I ma ban k'a ka daalili jaabi.

⁴ I y'a ta ɲa kosɔbɛ. I ye masafugulan sanulaman biri a kunna.

⁵ A ye sii daali e fɛ, i y'o d'a ma. I ye sijan d'a ma daan te min na.

⁶ E y'a kisi minkɛ, o le kama a ye boɲa sɔrɔ. I ye dawula ni nɔɔrɔ la a kan.

⁷ E y'a kɛ dubaden ye kudayi. E y'a nisɔndiya kosɔbɛ i ɲakɔrɔ.

⁸ Masacɛ b'a jigi la Masaba kan. Fɛɛn bɛɛ kuntigi ka ɲumanya kosɔn, foyi ten'a sɔrɔ.

⁹ Masacɛ, i bena se i juguw kɔrɔ. E ka sebagaya fɛ, i bena se i kɔniyabagaw kɔrɔ.

¹⁰ Tasumaba be fɛɛn kɛ cogo min na, i bena u kɛ ten fana. N'i ye i yɛrɛ yira dɔrɔn, Masaba diminin bena u halaki ni tasuma ye.

¹¹ I bena u kɔmɔgɔw halaki diɲɛ kɔnɔ, i bena u ka siyaw tunu ka bɔ adamadenw cɛma.

¹² Hali n'u ye kojugu labɛn i kama, hali n'u ye dabari kɛ i kama, o si tena se ka kɛ abada.

¹³ E kɔni bena u bon n'i ka kala ye, u bena to ka boli i ɲa.

¹⁴ Masaba, e k'i ka setigiya yira, anw bena i tanu k'i ka seko fɔ.