Zaburu 20 - ALA KA KUMA

Daalili, see sɔrɔli kosɔn

¹ Dɔnkililabagaw kuntigi ka dɔnkili. Dawuda ka dɔnkili Ala ye.

² Masaba k'i dɛmɛ i ka dusukasi waati la, Yakuba ka Ala yɛrɛ k'i tanga.

³ K'a to a ka sigiyɔrɔ la, a k'i dɛmɛ, k'a to *Siyɔn dugu kɔnɔ a k'i mako ɲa.

⁴ A hakili ka to i ka sarakaw bɛɛ la, a ka sɔn i ka saraka jɛnitaw ma.

⁵ I be fɛɛn min fɛ, a k'o d'i ma. I be koo min latigɛ, a k'o ɲa.

⁶ An bena nisɔndiya i ka sesɔrɔ la, an bena nisɔndiya an ka Ala tɔgɔ la. Masaba k'i ka daaliliw bɛɛ jaabi.

⁷ Ne y'a lɔn sisan tiɲɛ na ko Masaba b'a ka mɔgɔwolomanin kisi. Hali k'a to a sigiyɔrɔ la sankolo la, a b'a bɔsi sɔbɛ la.

⁸ Dɔw b'u jigi la u ka kɛlɛkɛwotorow kan, dɔ wɛrɛ ta ye u ka soow ye. An kɔni, an jigi be Masaba an ka Ala le kan.

⁹ Olu kɔni be kurula ka bɔ ka ben. Anw kɔni, anw be wili ka lɔ ka ɲa.

¹⁰ Masaba, masacɛ kisi! N'an y'i wele tuma min na, i k'an jaabi.