Zaburu 2 - ALA KA KUMA

Ala ka masa wolomanin

¹ Mun na siyaw be murutira? Mun na u ye ŋaniyafu ta ten?

² Masacɛw wilila, jamana ɲamɔgɔw y'u kaan bɛn ka Masaba n'a ka mɔgɔwolomanin kɛlɛ.

³ U ko: «An ka ban u ka fanga na, an ka ban u ka kuntigiya la pepewu.»

⁴ O la, Sankolotigi be yɛlɛla u ma, Matigi b'u lɔgɔbɔra.

⁵ A diminin be kumana u fɛ, a ka dimi ye siranya bila u la.

⁶ A ko: «Ne le ye n ka Masacɛ sigi masaya la *Siyɔn kulu kan, ne ka kulu senuman.»

⁷ Ne bena Masaba ka kolatigɛnin fɔ. A ko ne ma: «I ye ne Dencɛ ye, ne le y'i wolo bii.

⁸ Ne daali, ne bena siya wɛrɛw kɛ i ta ye, ani ka diɲɛ bɛɛ d'i ma.

⁹ I bena nigɛbere kɛ k'u halaki. Dagadilanbaga ka daga be ci ka mugumugu cogo min na, i bena u kɛ ten.»

¹⁰ O la masacɛw, sisan aw ka kɛ hakilitigiw ye. Jamana ɲamɔgɔw, aw ye sɔn ladili ma.

¹¹ Aw ye baara kɛ Masaba ye ni ɲasiran ye. Aw ka nisɔndiya, aw k'aw yɛrɛ majigi.

¹² Aw k'a Dencɛ boɲa janko a kana dimi, aw kana bari ka sa, bari a dimi man gwɛlɛ. Mɔgɔ minw bɛɛ b'u yɛrɛ kalifa a ma, olu dagamunin lo.