Zaburu 19 - ALA KA KUMA

Ala ka sebagaya

¹ Dɔnkililabagaw kuntigi ka dɔnkili. Dawuda ka dɔnkili dɔ.

² Sankolo be Ala ka sebagaya yira, sankolo be Ala bulonɔ yira.

³ Tile b'o koo fɔ tile wɛrɛ ye, suu be lɔnniya di suu wɛrɛ ma.

⁴ O te kɛ ni koo ɲafɔli ye, walima ni kuma ye, u kumakan te mɛn.

⁵ Nga u be min yira, o be ye dugukolo faan bɛɛ la, o be mɛn fɔɔ diɲɛ daan na. Danbaga ye sigiyɔrɔ di tile ma yɔrɔ min na,

⁶ a be bɔ o yɔrɔ la i ko kɔɲɔcɛ bɔtɔ a ka soo kɔnɔ. A nisɔndiyanin b'a ka taama daminɛ i ko kanbelenŋana.

⁷ A be bɔ diɲɛ daan kelen na, ka taga a faan dɔ la, fɛɛn si te yen min be kisi a ka funteni ma.

*

⁸ Masaba ka sariya tilennin lo, a be barika don mɔgɔ la. Masaba ka fɔta ye tiɲɛ ye, a be lɔnniya di kolɔnbali ma.

⁹ Masaba ka fɔtaw ka ɲi, o be mɔgɔw nisɔndiya. Masaba ka ɲinita gwɛnin lo, o be mɔgɔw ɲaa yɛlɛ.

¹⁰ Masaba ɲasiran be na ni kɔnɔgwɛ ye, o kɔnɔgwɛ nin tena dabila fewu. A ka kolatigɛninw ye tiɲɛ ye, u bɛɛ tilennin lo fana.

¹¹ U ka ɲi ka tɛmɛ sanu kan, hali ka tɛmɛ sanu yɛrɛyɛrɛ caaman kan. U ka di ka tɛmɛ lii kan, hali ka tɛmɛ lii diman yɛrɛ kan.

¹² Masaba, o y'i ka baarakɛla lalɔnniya, nafaba b'o batoli la.

¹³ Masaba, jɔn be se k'a ka fili lɔn? Ne te n ka kojugu minw kala ma, e ka olu yafa n ma.

¹⁴ Ne tanga ŋaniyajugu ma, a kana se ne kɔrɔ. O la, ne jalakibali bena to, n fana bena kisi kojugu ma.

¹⁵ E ka sɔn ne ka kuma ni n ka miiri ma, Masaba, ne tangakabakuru ni n kunmabɔbaga.