Zaburu 15 - ALA KA KUMA

Ala be min ɲini a ka mɔgɔw fɛ

1 Dawuda ka dɔnkili dɔ.

¹ Dawuda ka dɔnkili dɔ. Masaba, jɔn le bena to i ka soo kɔnɔ? Jɔn le bena sigi e ka kulu senuman kan?

² O ye mɔgɔ jalakibali ye, min be kotilennin kɛ, ani min be tiɲɛ fɔ ni kɔnɔgwɛ ye.

³ A te mɔgɔ tɔgɔjugu fɔ, a te kojugu kɛ a tɔɲɔgɔn na, a fana t'a sigiɲɔgɔn nɛni.

⁴ Ala te minw fɛ, a fana t'o fɛ, a fana be Masaba ɲasiranbagaw boɲa. N'a kalila koo minw na, a b'o kɛ, hali n'o b'a mako sa.

⁵ A te wari juru don tɔnɔ kama, a fana te fɛɛn minɛ ka mɔgɔ jalakibali ka tiɲɛ munumunu. Mɔgɔ min be koo kɛ ten, o tigi te ben fewu.