Zaburu 146 - ALA KA KUMA

Dɛsɛbagatɔw dɛmɛbaga Ala

¹ Aw ka Masaba tanu. Ne b'a tanu.

² Ka ne to nii na, ne ben'a tanu. Ka ne to sii la, ne bena dɔnkili la Ala ye.

³ Aw kana aw jigi la mɔgɔbabaw kan. Adamadenw lo, u te se ka mɔgɔ kisi.

⁴ A ka ninakili be ban, a be kɔsegi buguri kɔnɔ. O loon na, a ka kolatigɛninw be ban.

⁵ Yakuba ka Ala ye mɔgɔ min dɛmɛbaga ye, n'a b'a jigi la Masaba a ka Ala kan, o tigi dagamunin lo.

⁶ Masaba le ye sankolo ni dugukolo dan. A ye kɔgɔji n'a kɔnɔfɛnw bɛɛ dan. Ale lo ye tiɲɛtigi ye kudayi.

⁷ A be mɔgɔ tɔɲɔnin ka tiɲɛ fɔ, a be dumuni di kɔngɔtɔ ma. Ale lo be kasodenw hɔrɔnya.

⁸ Masaba be fiɲɛntɔw ɲaa yɛlɛ. A be mɔgɔ barika banninw dɛmɛ. Mɔgɔtilenninw koo ka d'a ye.

⁹ Masaba be lonanw tanga. A be falatɔw ni firiyamusow dɛmɛ, nga a b'a kɛ mɔgɔjugu ka kolatigɛninw be cɛn.

¹⁰ Masaba ye kuntigi ye kudayi, *Siyɔn, e ka Ala lo tuma bɛɛ. Aw ka Masaba tanu.