Zaburu 144 - ALA KA KUMA

Masacɛ ka daalili

1 Dawuda ka dɔnkili dɔ.

¹ Dawuda ka dɔnkili dɔ. Ne be barika la Masaba ye, ne tangakabakuru. Ale lo be ne bolo walawala kɛlɛkɛyɔrɔ la.

² Ne wasabaga ni ne dogoyɔrɔ barikaman lo, ne dogoyɔrɔba ni ne bɔsibaga lo. Ne tangabaga, ne be n yɛrɛ dogo min kɔrɔ, ale lo be siyaw don ne ka fanga kɔrɔ.

³ Masaba, adamaden ye mun ye, n'i b'i janto a la? Mɔgɔ ye mun ye, n'i be miiri a la?

⁴ Mɔgɔ be i ko dafɔɲɔ, a sii tile be tɛmɛ i ko suma.

⁵ Masaba, e ka bɔ sankolo la ka jigi. E ka maga kuluw la, sisi ka wili u kan.

⁶ A to san be manamana ka ne juguw jɛnsɛn, e ka biɲɛw ci k'u jɛnsɛn.

⁷ K'i to sanfɛ, i bolo jigi, i bolo jigi ka ne kisi lonanw ma, minw be ne kɛlɛla.

⁸ Galontigɛlaw ni namarakɛlaw lo.

⁹ Ala, ne bena dɔnkilikura la e ye, ne bena e makiri ni gɔni juru tan ye.

¹⁰ Ala be masaw dɛmɛ u be see sɔrɔ. A b'a ka baarakɛla Dawuda kisi murujan fariman ma.

¹¹ Ne kisi, ne bɔsi lonanw bolo, minw ye galontigɛlaw ni namarakɛlaw ye.

¹² An dencɛw ka kɛ i ko yiriw, minw wilicogo ɲana kabini u wilitɔ kura. An denmusow ka kɛ i ko tutunanw, minw ɲɛgɛnni be masaso kɔnɔ.

¹³ An ka bondow ka fa, u ka fa suman sifa bɛɛ la. An ka begɛnmisɛnw ka buguya ka se waa ni waa ma, u ka buguya ka se waa tan tan ma.

¹⁴ An ka misiw ka caya. Cɛnni kana kɛ an fɛ tugu, an fana kana minɛ ka taga, kulekan kana mɛn an ka forobayɔrɔw la tugu.

¹⁵ Jama min ta be ten, ale dagamunin lo. Masaba ye jama min ka Ala ye, ale dagamuna.