Zaburu 143 - ALA KA KUMA

Ala ka ne tanga kiti ma

1 Dawuda ka dɔnkili dɔ.

¹ Dawuda ka dɔnkili dɔ. Masaba, ne ka daalili lamɛn, i tulo malɔ ne ka daalili la. E ka kantigiya n'i ka tilenninya kosɔn, ne jaabi.

² Kan'i ka baarakɛla kiti, bari mɔgɔ si te yen min tilennin lo ele ɲakɔrɔ.

³ Ne jugu be ne tɔɔrɔla. A ye ne ben duguma, ka n tereke. A ye ne don dibi kɔnɔ, i ko suuw.

⁴ Ne barika banna pewu, ne jigi tigɛra pewu.

⁵ Ne hakili be loon tɛmɛninw la. Ne be miiri e ka kɛwaliw bɛɛ la. Ne be n hakili jigi e ka kɛtaw la.

⁶ Ne be n bolo wili i ɲakɔrɔ k'i daali. I koo be ne la i ko dugukolo janin mako be jii la cogo min na.

⁷ Masaba, ne jaabi joona, ne te se tugu. Kana i yɛrɛ dogo ne la. N'o tɛ, ne bena kɛ i ko mɔgɔ minw be sara.

⁸ E ka ɲumanya yira ne la kabini sɔgɔma, bari ne jigi be e kan. Ne ka tɛmɛsira yira n na, bari ne be ele daali.

⁹ Masaba, ne kisi n jugu ma, ne be dogo ele le fɛ.

¹⁰ Ne kalan i sago la, bari ele le ye n ka Ala ye. E ka ɲumanya kɛ ne ye ka taga ni ne ye yɔrɔɲuman na.

¹¹ A to ne be to sii la e tɔgɔ kosɔn. Ne bɔ dusukasi la e ka tilenninya kama.

¹² I bena ne juguw halaki i ka ɲumanya kosɔn. I bena ne kɛlɛbagaw bɛɛ halaki, bari ne y'i ka baarakɛla ye.