Zaburu 141 - ALA KA KUMA

Sigɛnbagatɔ b'a yɛrɛ kalifa Ala ma

1 Dawuda ka dɔnkili dɔ.

¹ Dawuda ka dɔnkili dɔ. Masaba, ne b'i daali, na ne dɛmɛ joona. E tulo malɔ ne ka daalili la, e daalituma.

² A to ne ka daalili ka se i ma i ko wusulan, ne bolo kɔrɔtanin ka kɛ i ko wulafɛ saraka.

³ Masaba, ne daa tanga, ne daa mara.

⁴ Kan'a to ne be miiri kojugu la, ne kana miiri kojugukɛ la, ne kana fara kojugukɛlaw kan, ne kana fara u kan u ka kɛtaw la.

⁵ Mɔgɔtilennin ka ne bugɔ, o ye hɛrɛ ye. A ka ne jalaki, o be i ko tulu bɔnnin ne kunna, ne te ban o la fewu. Nga ne b'i daali tugu mɔgɔjugu ka juguya kama.

⁶ Tuma min na u ɲamɔgɔw bena porokoto ka ben faraw kan, o tuma na, mɔgɔw ben'a lɔn ko n ka kuma tun ye tiɲɛ ye.

⁷ Mɔgɔ be dugukolo wili ni daba ye cogo min na, u kolow yɛrɛkɛnin be kaburuda la ten.

⁸ Ne ɲaa be ele Matigi, Masaba le la. Ne be dogo ele le fɛ, kan'a to ne be sa.

⁹ U be jaan min la ne ɲafɛ, ne tanga o ma. Ne kisi kojugukɛlaw ka ŋaniyajugu ma.

¹⁰ Mɔgɔjuguw ka ben u yɛrɛw ka jɔɔw kɔnɔ. Ne kɔni ka kisi u ma.