Zaburu 140 - ALA KA KUMA

Mɔgɔ hakiliɲagaminin ka daalili

¹ Dɔnkililabagaw kuntigi ka dɔnkili. Dawuda ka dɔnkili dɔ.

² Masaba, ne bɔsi mɔgɔjuguw bolo. Ne tanga mɔgɔfarimanw ma.

³ U be kojugu dɔrɔn miiri. Loon o loon, u be kɛlɛ wili.

⁴ U b'u nɛɛn kɛ i ko saa ta. U ka kuma be i ko fɔnfɔnni ka baga.

⁵ Masaba, ne tanga mɔgɔjuguw ma. Ne kisi mɔgɔfarimanw ma, minw be ne benko miirila.

⁶ Yɛrɛboɲalaw ye jaan la ne ɲa. U ye juru ni jɔɔ la sira kan, u ye kɛlɛdenw dogo ne kama.

⁷ Ne kɔni b'a fɔ Masaba ye ko: «E ye ne ka Ala ye.» Masaba, i tulo malo ne ka daalili la.

⁸ Matigi, Masaba, ne kisibaga barikaman, i be ne tanga kɛlɛ loon na.

⁹ Masaba, kan'a to mɔgɔjugu ka ɲinita be kɛ. Kan'a to a ka kolatigɛninw be kɛ, janko a kan'a yɛrɛ funu.

¹⁰ Minw ye ne lamini ni kumajuguw ye, u ka kumajuguw kunko ka ben u yɛrɛ kunna.

¹¹ Takami ka bɔn u kan, u ka ɲɔti ka fili tasuma kɔnɔ. U ka fili dingɛ kɔnɔ, u tena se ka bɔ yɔrɔ min na.

¹² Minw be galon tigɛ ka mɔgɔ tɔgɔ cɛn, o kana to jamana kɔnɔ. Juguman ka mɔgɔ fariman kɔgwɛn tuma bɛɛ.

¹³ Ne kɔni y'a lɔn ko Masaba bena sigɛnbagatɔ ka tiɲɛ fɔ, ko a bena fantan ta ɲa.

¹⁴ Tiɲɛ na, mɔgɔtilenninw bena e bato. Mɔgɔɲumanw bena sigi e ɲakɔrɔ, Masaba.