Zaburu 137 - ALA KA KUMA

Isirayɛlidenw n'o juguw ka koo

¹ K'an to Babilɔni baaw daa la, an tun siginin be o yɔrɔ la n'an be kasira, an tun be miiri *Siyɔn la.

² An tun y'an ka gɔniw dulon yiriw kan.

³ K'an to o yɔrɔ la, an minɛbagaw y'a fɔ ko an ka dɔnkili la, an tɔɔrɔbagaw ko an ka nisɔndiya dɔnkili la. U ko: «Aw ye Siyɔn dɔnkili dɔ la an ye.»

⁴ Nga an be se ka Masaba ka dɔnkili la jamana wɛrɛ la cogo di?

⁵ Ni ne ɲinɛna e kɔ, Zeruzalɛmu, n kinibolo ka faga.

⁶ Ni n hakili ma to e koo la, Zeruzalɛmu, ni n ma e bila n ka nisɔndiya koo bɛɛ ɲafɛ, n nɛɛn ka nɔrɔ n daa la.

⁷ Masaba, e hakili to edɔmuw ka kɛtaw la loon min na Zeruzalɛmu dugu minɛna. U tun be to k'a fɔ ko: «Aw y'a ci, aw y'a ci fɔɔ a juu la.»

⁸ Babilɔnikaw, aw bena halaki. A ye min kɛ an na, mɔgɔ min bena o ɲɔgɔn kɛ aw la, o tigi dagamunin lo.

⁹ Mɔgɔ min bena i deenw minɛ k'u halaki fara kan, o tigi dagamunin lo.