Zaburu 132 - ALA KA KUMA

Masaba sigiyɔrɔ Siyɔn

1 Zeruzalɛmu taadɔnkili dɔ.

¹ Zeruzalɛmu taadɔnkili dɔ. I hakili to Dawuda la, Masaba. I hakili to a ka sigɛnw bɛɛ la.

² A y'a daa di Masaba ma. A ye dajuru ta Yakuba ka Setigi ye ko:

³ «Ne tena don n ka soo kɔnɔ fewu, ne tena taga la n ka dilan kan fewu,

⁴ ne tena n ɲaa tugu, ne tena sinɔgɔ,

⁵ fɔɔ ne ka yɔrɔ sɔrɔ Masaba ye, fɔɔ ne ka sigiyɔrɔ sɔrɔ Yakuba ka Setigi ye.»

⁶ An y'a ka layidu taamasiɲɛ kɛsu koo mɛn Efarata, an y'a sɔrɔ Yaari mara la.

⁷ An ka taga Masaba ka sigiyɔrɔ la. An k'an kunbiri gwan a seen bilayɔrɔ ɲa.

⁸ Masaba, wili ka na i ka lafiɲɛyɔrɔ la, ele n'i ka layidu taamasiɲɛ kɛsu, min y'i ka sebagaya taamasiɲɛ ye.

⁹ I ka sarakalasebagaw ka to tilenninya la, i ɲasiranbagaw ka nisɔndiyapɛrɛn kɛ.

¹⁰ A kɛ i ka baarakɛla Dawuda kama. Kana i ka mɔgɔ wolomanin gwɛn.

¹¹ Masaba ye layidu ta Dawuda ye, a ten'a daa yɛlɛma. A ko: «I deen dɔ le bena sigi i nɔɔ na masaya la.

¹² N'i deenw fana ye ne ka bɛɛn, ani n ka ɲinita bato, n bena u kalan minw na, u deenw le bena to ka sigi masasigilan nin kan kudayi.»

¹³ Tiɲɛ na, Masaba le ye *Siyɔn woloma. A y'a kɛ a sigiyɔrɔ ye.

¹⁴ A ko: «Ne sigiyɔrɔ lo kudayi. Ne bena to yen bari ne b'a le lo fɛ.

¹⁵ Ne bena Siyɔn ka sɔrɔ yiriwa. Ne ben'a to a kɔnɔ dɛsɛbagatɔw be dumuni kɛ ka fa.

¹⁶ Ne ben'a ka sarakalasebagaw kisi. Ne ɲasiranbagaw bena nisɔndiyapɛrɛn kɛ.

¹⁷ Ne bena masacɛ setigi sigi ka bɔ Dawuda deenw cɛma. Ne ye masacɛ min woloma, ale bena to yen ka kɛ i ko fitinɛ mananin.

¹⁸ Ne ben'a juguw maloya, ka masafugulan manamananin biri a kuun na.»