Zaburu 12 - ALA KA KUMA

Dɛmɛ ɲini daalili

¹ Dɔnkililabagaw kuntigi ka dɔnkili. Gɔni juru seegi le be fɔ a latuma na. Dawuda ka dɔnkili dɔ.

² Masaba, an dɛmɛ, bari mɔgɔ kantigiw te yen tugu. Tiɲɛfɔla te ye adamadenw cɛma tugu.

³ U be galon tigɛ ɲɔgɔn ye. Namarakuma le b'u daa la. U t'u kɔnɔ gwɛ ɲɔgɔn ye fewu.

⁴ Masaba, namaratɔ nunu bɔ yen. E ka dabayakumafɔbaga nunu bɔ yen.

⁵ Olu minw b'a fɔra ko see b'u ye u ka kuma barika la, ko u daa b'u fɛ, ko: «Jɔn le be se ka kɛ an kuntigi ye?»

⁶ O la, Masaba ko ale bena wili ka dɔ kɛ, bari u be dɛsɛbagatɔw sigɛnna, ɲanibagatɔw be ŋunanna. U be mɔgɔ minw tɔɔrɔla, ko ale bena olu dɛmɛ.

⁷ Masaba ka kuma gwɛnin lo i ko warigwɛ min yelenna ka saniya siɲɛ caaman.

⁸ Ee, Masaba! An mara. An tanga o mɔgɔ sugu ɲɔgɔn ma tuma bɛɛ.

⁹ Mɔgɔjugu be munumununa yɔrɔ bɛɛ la. Juguya boɲana adamadenw cɛma.