Zaburu 112 - ALA KA KUMA

Masaba ɲasiranbaga ka dagamu

¹ Masaba ka tanu. Mɔgɔ min be siran Masaba ɲa, k'a ka ɲinitaw bato ni nisɔndiya ye, o tigi dagamunin lo.

² O tigi deenw bena barika sɔrɔ jamana kɔnɔ, bari Masaba be koɲuman kɛ mɔgɔtilenninw bɛɛ ye.

³ Mɔgɔtilennin ta ka ɲi, a be ɲasuma na. Masaba be sɔn a ta ma tuma bɛɛ.

⁴ Dibi waati la, yeelen be bɔ mɔgɔtilennin ye, mɔgɔtilennin be makari, a be hinɛ, a tilennin lo.

⁵ Mɔgɔ min be makari a tɔɲɔgɔn na ka fɛɛn dɔndɔ a ma, min b'a ka koow ɲanabɔ ni tilenninya ye, o tigi dagamunin lo.

⁶ Mɔgɔtilennin tena dɛsɛ foyi la. A koo bena to mɔgɔw hakili la kudayi.

⁷ A te siran mɔgɔw ka tɔgɔcɛnkuma ɲa. A jigi be Masaba kan kosɔbɛ.

⁸ A jigi siginin lo kosɔbɛ, a jigi te tigɛ. A b'a juguw halakili makɔnɔ.

⁹ A be fantan sɔn ni dusuɲuman ye, a ka tilenninya te ban abada. A be barika ni kunkɔrɔta sɔrɔ.

¹⁰ Mɔgɔjugu b'a ye ka dimi, a b'a ɲiin cin fɔɔ ka dɛsɛ. Mɔgɔjugu ka miiri bena tunu.