Zaburu 111 - ALA KA KUMA

Masaba ka ɲumanya

¹ Masaba ka tanu. Ne ben'a tanu ni n dusu bɛɛ ye.

² Masaba ka kɛwaliw ka bon haali! U ka di mɔgɔ minw ye, olu b'o sɛgɛsɛgɛ.

³ Boɲa ni karama le b'a ka kɛwaliw kan. A ka kantigiya te ban abada.

⁴ A b'a fɛ a ka kabakokow ka to mɔgɔ hakili la. Masaba be makari, a be hinɛ!

⁵ A be dumuni di a ɲasiranbagaw ma. A hakili b'a ka bɛɛn la tuma bɛɛ.

⁶ A ye siya wɛrɛw ka jamana bɔsi k'a di a ka jama ma k'a ka sebagaya yira u la ten.

⁷ A ka baara ye kantigiya ni tilenninya ye. Mɔgɔ be se k'a jigi la a ka fɔta bɛɛ kan.

⁸ U be yen kudayi, u kɛra tiɲɛ ni tilenninya la.

⁹ A y'a ka jama bɔsi ka bɛɛn kɛ n'u ye, bɛɛn min te ban. A tɔgɔ ka senu, siranya Ala lo.

¹⁰ Lɔnniya daminɛyɔrɔ ye Matigi ɲasiran ye. Mɔgɔ minw y'a sɔrɔ, olu be koo faamu ka ɲa. Masaba tanuko ye waati bɛɛ koo ye.