Zaburu 11 - ALA KA KUMA

I jigi la Masaba kan

1 Dɔnkililabagaw kuntigi ka dɔnkili. Dawuda ka dɔnkili dɔ.

¹ Dɔnkililabagaw kuntigi ka dɔnkili. Dawuda ka dɔnkili dɔ. Ne be n yɛrɛ kalifa Masaba le ma. Aw be se k'a fɔ ne ye cogo di ko: «Boli ka taga dogo kuluw la i ko kɔnɔw?»

² A ye, mɔgɔjuguw b'u ka kalaw labɛnna. U be biɲɛw lara kalajuruw kan, janko ka mɔgɔ kɔnɔgwɛninw bon dogo la.

³ Ni koo sindiyɔrɔ ɲagamina, mɔgɔtilennin be se ka mun le kɛ tugu?

⁴ Masaba b'a ka soo kɔnɔ, a ka masasigilan be sankolo la. A ɲaa be adamadenw na, a b'u ka koow sɛgɛsɛgɛra.

⁵ A be mɔgɔtilennin ni mɔgɔjugu ka koo sɛgɛsɛgɛ. Fariya ka di tigi min ye, o tigi koo man d'a ye.

⁶ A be takami ni kiribi bɔn mɔgɔjugu kan. Cɛnnikɛfɔɲɔ le y'u niyɔrɔ ye.

⁷ Bari Masaba tilennin lo, kotilennin lo ka d'a ye. Mɔgɔtilennin le ben'a ye fana.