Zaburu 108 - ALA KA KUMA

Ala tanuko

¹ Dawuda ka dɔnkili dɔ.

² Ala, jigi be ne fɛ. Ne bena dɔnkili la k'i makiri sɔbɛ la.

³ Ne ka gɔni ni ne ka kolonjo, aw ka labɛn. Ne bena kɔn tile ɲa.

⁴ Ne bena i bato jama cɛma, Masaba. Ne bena i makiri siya wɛrɛw cɛma.

⁵ Bari i ka ɲumanya ka bon i ko sankolo, e ka tiɲɛ be se sankabaw ma.

⁶ Ala, i ka boɲa yira sankolo la. A to i ka nɔɔrɔ ka se dugukolo yɔrɔ bɛɛ la,

⁷ janko minw koo ka d'i ye, i k'olu bɔsi. I kinibolo kɛ ka kisili kɛ, ne jaabi.

⁸ Ala kumana k'a to a ka sigiyɔrɔ la: «Ne bena see sɔrɔ, n be Sisɛmu tilan, n be Sukɔti suma.

⁹ Galaadi mara ye ne ta ye, Manase mara fana ye ne ta ye. Efarayimu mara kɛra i ko ne ka kɛlɛkɛfugulan, Zuda mara kɛra i ko ne ka masabere.

¹⁰ Mowabu mara ye n koyɔrɔ ye, Edɔmu mara ye n ka sanbara filiyɔrɔ ye. N be kɛlɛ pɛrɛnkan bɔ Filisi jamana kama.»

¹¹ Jɔn le bena taga ni ne ye dugu barikaman kɔnɔ? Jɔn bena taga ni ne ye Edɔmu mara la?

¹² Ele Ala tɛ wa? E min tun y'an bila, e te tagara kɛlɛ la n'an ka kɛlɛdenw ye tugu.

¹³ An dɛmɛ juguw kama, adamaden ka dɛmɛ te foyi ye.

¹⁴ Ni Ala be n'an ye, an bena cɛfariyako kɛ. Ale lo bena an juguw halaki.