Zaburu 107 - ALA KA KUMA

Sɛbɛ duurunan ( Dal 107—150 ) Barika lali Ala ye

¹ Aw ka Masaba bato bari a ka ɲi, a ka ɲumanya te ban abada.

² Masaba ye minw kumabɔ k'u bɔsi u juguw bolo, u ka kan k'o le fɔ.

³ A y'u lajɛn ka bɔ jamanaw bɛɛ la, kɔrɔn fɛ taw ni tileben taw, ani kɔgɔdugu ni worodugu taw.

⁴ U dɔw tun tununa kongokolon kɔnɔ, u ma dugu sɔrɔ ka sigi yen.

⁵ Kɔngɔ ni minnɔgɔ y'u tɔɔrɔ, u barika tun banna.

⁶ K'u to u ka dusukasi la, u kasira Masaba nɔɔ fɛ, ale y'u kisi ka bɔ u ka sɛgɛn na.

⁷ A ye siratilennin don u seen kɔrɔ, janko u ka taga dugu dɔ la u be se ka sigi min kɔnɔ.

⁸ U ka kan ka Masaba bato a ka ɲumanya kosɔn, k'a bato a ka kabako kosɔn adamadenw ye.

⁹ Bari a ye jii di minnɔgɔtɔw ma, u ka minnɔgɔ banna. A fana ye dumuni di kɔngɔtɔw ma fɔɔ u fara.

¹⁰ Dɔw tun be dibijugu kɔnɔ. U tun be kaso la tɔɔrɔ ni jɔrɔkɔ la.

¹¹ Bari u tun murutira Ala ka kuma ma, u banna Fɛɛn bɛɛ kuntigi ka kolatigɛninw ma.

¹² A y'u majigi tɔɔrɔ barika la. U talonna, mɔgɔ tun te yen k'u dɛmɛ.

¹³ K'u to u ka dusukasi la, u kasira Masaba nɔɔ fɛ, ale y'u kisi ka bɔ u ka sɛgɛn na.

¹⁴ A y'u bɔ dibijugu kɔnɔ, a y'u ka jɔrɔkɔw tigɛ.

¹⁵ U ka kan ka Masaba bato a ka ɲumanya kosɔn, k'a bato a ka kabakow kosɔn adamadenw ye.

¹⁶ Bari a ye koon ziralamanw kari, ka sɔgɔnan nigɛlamanw cɛn.

¹⁷ Nalomanw ka kokolonw n'u ka kojuguw y'u ta cɛn.

¹⁸ Dumuni sifa bɛɛ nigɛ bɔra u la, u tun sera saya ma.

¹⁹ K'u to u ka dusukasi la, u kasira Masaba nɔɔ fɛ, ale y'u kisi ka bɔ u ka sɛgɛn na.

²⁰ A kumana dɔrɔn, u kɛnɛyara, a y'u bɔsi saya bolo.

²¹ U ka kan ka Masaba bato a ka ɲumanya kosɔn, k'a bato a ka kabakow kosɔn adamadenw ye.

²² U ka barika l'a ye ni sarakaw ye. U k'a ka koɲumanw fɔ ni nisɔndiyapɛrɛnkan ye.

²³ Minw tun be taama kurunw kɔnɔ kɔgɔji kan, minw tun be jago kɛ jii kan,

²⁴ ye Masaba ka kɛtaw ye. U y'a ka kabakow ye kɔgɔji kan.

²⁵ A kumana dɔrɔn, fɔɲɔba wilila, fɔɲɔ min ye jikuruw wili.

²⁶ U ka kurunw tun be fifa ka wili sanfɛ, ka tila ka jigi. U jaa tun tigɛra kosɔbɛ o kosɔn.

²⁷ Ɲanamini y'u minɛ, u be talontalon i ko dɔrɔtɔw. U tun t'u yɛrɛ kala ma, u tun te se ka foyi kɛ.

²⁸ K'u to u ka dusukasi la, u kasira Masaba nɔɔ fɛ, ale y'u kisi ka bɔ u ka sɛgɛn na.

²⁹ A y'a kɛ fɔɲɔba lɔra, jikuruw malara.

³⁰ Yɔrɔ malara, o kɛra nisɔndiya ye u fɛ. Masaba y'u bila sira ka taga se u bɔyɔrɔ la.

³¹ U ka kan ka Masaba bato a ka ɲumanya kosɔn, k'a bato a ka kabakow kosɔn adamadenw ye.

³² U ka Masaba makiri jama cɛma, u k'a boɲa cɛkɔrɔbaw ka ɲɔgɔnyeyɔrɔ la.

³³ A be bajiw kɛ kongokolon ye, a be jii bɔyɔrɔw kɛ yɔrɔ janin ye.

³⁴ A be dugukoloɲuman yɛlɛma k'a kɛ nafatan ye o yɔrɔ mɔgɔw ka juguya kosɔn.

³⁵ A be kongokolon yɛlɛma k'a kɛ lɛɛ ye, ka dugukolo janin kɛ jii bɔyɔrɔ ye.

³⁶ A b'a kɛ kɔngɔtɔw be balo, ka dugu sigi.

³⁷ U be forow bɔ, ka *ɛrɛzɛnsunw tutu, k'u deenw sɔrɔ kosɔbɛ.

³⁸ Masaba y'u ta ɲa, u cayara kosɔbɛ. Foyi te bɔ u ka begɛn na fana.

³⁹ Nga dɔw be dɔgɔyara le, ka nagasi. O kɛra sɛgɛn ni tɔɔrɔ kama.

⁴⁰ A be mɔgɔbabaw dɔgɔya. A y'u to u tununa ka yaala kongo kɔnɔ, sira ma sɔrɔ.

⁴¹ A be fantan bɔ sɛgɛn na, a b'a kɛ u ka mɔgɔ be buguya i ko begɛn.

⁴² Mɔgɔtilenninw b'o ye, u be nisɔndiya, nga mɔgɔjugu si tena se ka foyi fɔ.

⁴³ Kolɔnbaga k'o koow kɔlɔsi kosɔbɛ, a ka Masaba ka koɲumanw faamu.