Zaburu 106 - ALA KA KUMA

Isirayɛlidenw ka murutikow

¹ Masaba ka tanu! Aw k'a makiri bari a ka ɲi, a ka ɲumanya te ban abada.

² Jɔn le bena Masaba ka kobabaw fɔ? Jɔn ben'a makiri?

³ Mɔgɔ minw b'a ka sariyaw mara ka tilenninyako kɛ, o tigi dangamunin lo.

⁴ E hakili to ne la e ka jama dɛmɛwaati la, Masaba. Ne kisi n'u ye

⁵ janko ne ka se k'i ka mɔgɔwolomaninw ka dagamu tɔnɔ ye, ka se ka nisɔndiya n'i ka jama ye, ka kunkɔrɔta sɔrɔ n'u ye.

⁶ An ye kojugu kɛ i ko an faaw. An filila, an jalakinin lo.

⁷ K'an faaw to Ezipiti, u tun ma a ka kabakow faamu, u ma u hakili to a ka koɲuman caaman na. U murutira Buruku kɔgɔji kɔrɔ.

⁸ Nga a y'u kisi a yɛrɛ tɔgɔ kosɔn. A y'u kisi janko k'a ka setigiya yira.

⁹ A ye Buruku kɔgɔji nin bagabaga, ale jara. A y'a kɛ u tɛmɛna jii cɛma i ko kongokolon.

¹⁰ A y'u kisi u kɔniyabagaw ma. A y'u bɔsi u juguw bolo.

¹¹ Jii y'u kɛlɛbagaw dumu, hali mɔgɔ kelen ma to.

¹² O tuma na, u lar'a ka kuma na, u ye dɔnkili la k'a tanu.

¹³ Nga u ɲinɛna joona joona a ka kɛtaw kɔ. U m'a ka kolatigɛnin laban kɔnɔ u faan fɛ.

¹⁴ K'u to kongokolon kɔnɔ, nigɛjugu y'u minɛ. U ye Ala kɔrɔbɔ yen.

¹⁵ U tun ye fɛɛn min daali, a y'o d'u ma, o kɔ, a y'a kɛ u fasara.

¹⁶ K'u to kongokolon kɔnɔ, Musa keliya y'u minɛ. Ala ka baarakɛla wolomanin Arɔn keliya y'u minɛ fana.

¹⁷ Dugukolo pɛrɛnna ka Datan kunu. A ye Abiramu n'a ka mɔgɔw datugu.

¹⁸ Tasuma y'u jɛni. Tasuma ye mɔgɔjuguw jɛni.

¹⁹ U ye misiden jaa lalaga *Orɛbu kulu kɔrɔ. U y'u kunbiri gwan jaa dilannin nin kɔrɔ.

²⁰ Ala min tun ye u ka boɲa ye, u y'a falen misi jaa la, binɲimifɛn.

²¹ U ɲinɛna Ala kɔ, u kisibaga. Ale min tun ye kabakow kɛ Ezipiti.

²² A ye kabakow kɛ Kamu ka mara kɔnɔ. A ye kobabaw kɛ Buruku kɔgɔji kɔrɔ.

²³ Masaba tun y'a fɔ ko a bena u halaki, a ka mɔgɔ wolomanin Musa y'a daali. A y'a daali ko a ka sabali, ko a kana u halaki.

²⁴ U ye jamanaɲuman lɔgɔbɔ, u ma la Ala ka fɔta la.

²⁵ U tora ka ŋunuŋunu u ka fanisow kɔnɔ, u ma Masaba ka fɔta bato.

²⁶ Masaba y'a bolo wili u kama janko k'u halaki kongokolon kɔnɔ.

²⁷ A b'a fɛ k'u kɔmɔgɔw halaki siya wɛrɛw cɛma, k'u jɛnsɛn jamana wɛrɛw la.

²⁸ Bari u tun nɔrɔla Baalipewɔri la, u ye sukɔrɔw ka sarakaw dumu.

²⁹ U y'a kɛ Masaba dimina u ka kɛwali kama, o la, banajugu dɔ donna u cɛma.

³⁰ Pinasi wilila k'o koo ɲanabɔ, o la, bana nin lɔra.

³¹ A kɛra mɔgɔtilennin ye o le kama. A be jati o ye hali fɔɔ ka taga se waati nata mɔgɔw fɛ.

³² U y'a kɛ Ala dimina Meriba jii gɛrɛfɛ. O le nana ni sɛgɛn ye Musa ma.

³³ U y'a hakili ɲagami kosɔbɛ. Musa ye kuma fɔ a ma miiri min na.

³⁴ Masaba tun ko u ka siya minw halaki, u ma sɔn k'olu halaki.

³⁵ U sigira ka ɲagami ni siya wɛrɛw ye, u ye olu ka kɛwaliw dege.

³⁶ U ye olu ka joow sɔn, o kɛra jaan ye u seen kɔrɔ.

³⁷ U y'u dencɛw n'u denmusow bɔ sarakaw la batofɛnw ye.

³⁸ U ye mɔgɔw faga gwansan, u y'u dencɛw n'u denmusow faga. U ye Kanaan joow sɔn n'u ye, jamana nɔgɔra o mɔgɔfaga nin kosɔn.

³⁹ U y'u yɛrɛ nɔgɔ n'u ka kɛwaliw ye. U kɛra kakalaw ye u ka koo kɛcogo fɛ.

⁴⁰ O la, Masaba dimin'a ka jama kɔrɔ, a ka mɔgɔw koo goyar'a ye.

⁴¹ A y'u don siya wɛrɛw bolo, u kɔniyabagaw ye kuntigiya kɛ u kan.

⁴² U juguw y'u tɔɔrɔ, u majigira u kɔrɔ.

⁴³ A tun be to k'u bɔsi waati dɔ, nga u y'u yɛrɛ kɛ murutibagaw ye. O la, u be tila ka don u ka filiw la tugu.

⁴⁴ Nga n'u kasira Masaba nɔɔ fɛ, ale b'u lamɛn.

⁴⁵ A b'a hakili jigi a ka layidu la. A be makari u la a ka ɲumanya kama.

⁴⁶ K'a kɛ u minɛbagaw be makari u la.

⁴⁷ Masaba an ka Ala, e k'an kisi. An bɔsi siya wɛrɛw bolo k'an lajɛn, janko an k'i tanu ka boɲa la i tɔgɔ senuman kan.

⁴⁸ Masaba, Isirayɛli ka Ala ka tanu tuma bɛɛ. Jama bɛɛ k'a fɔ: «Amiina!» Masaba ka tanu.