Zaburu 101 - ALA KA KUMA

Masacɛ ka dadiko

1 Dawuda ka dɔnkili dɔ.

¹ Dawuda ka dɔnkili dɔ. Ne be e ka ɲumanya n'i ka kotilenninw la dɔnkili la. Masaba, ne be ele le boɲana.

² Ne b'a fɛ ka to mɔgɔɲumanya la. E bena na ne fɛ tuma jumɛn? Ne bena taama n ka soo ka kɛɲɛ ni n ka dusuɲumanya ye.

³ Ne tena sɔn kojugu si ma. Minw b'u kɔɔ di Ala ma, olu koo man di ne ye. Ne tena jɛn n'u ye u ka kɛtaw la.

⁴ Mɔgɔjugu te tugu ne kɔ. Ne t'a fɛ ka kojugu kɛ.

⁵ Mɔgɔ min b'a tɔɲɔgɔn tɔgɔ cɛn dogo la, ne b'o tigi halaki. Ne te se ka dabayatigi ni yɛrɛboɲala ka koo muɲu.

⁶ Ne kɔni bena n hakili to jamana kɔnɔ mɔgɔsɔbɛw la, olu le bena to ne gɛrɛfɛ. Mɔgɔ min kɛra mɔgɔɲuman ye, o tigi le bena baara kɛ ni ne ye.

⁷ Namaramɔgɔ tena sigi ne ka soo, galontigɛla tena to ne ɲakɔrɔ.

⁸ Sɔgɔma o sɔgɔma, ne bena mɔgɔjuguw halaki. Ne bena kojugukɛlaw bɛɛ tunu Masaba ka dugu kɔnɔ.