Yunusu 2 - ALA KA KUMA

Zonasi be Ala daali

¹ O tuma na, Masaba ye jigɛba dɔ bila ka taga Zonasi kunu. A ye tile saba ni suu saba kɛ jigɛ nin kɔnɔ.

² K'a to jigɛ nin kɔnɔ, a ye Masaba, a ka Ala daali.

³ A ko: «Ka ne to dusukasi la, ne be kule Masaba nɔɔ fɛ, a be n jaabi. Ka ne to lahara, ne ye weleli kɛ, i ye ne lamɛn.

⁴ I ye ne fili dingɛba kɔnɔ kɔgɔji cɛma, ne jigira fɔɔ a jukɔrɔ. Ne tora jii kɔnɔ, i ka jii n'a ka mankanw bɛɛ be woyora ne kan.

⁵ Fɔɔ ne b'a fɔ ko ne gwɛnna ka bɔ i ɲakɔrɔ. O bɛɛ n'a ta, ne b'a fɛ ka e batoso ye tugu.

⁶ Jii ye ne kunun fɔɔ ne ninakili be ɲini ka lɔ, dingɛba kɔnɔ jii ye ne tunu. Kala melekenin be ne kuun na.

⁷ Ne jigira fɔɔ kuluw jukɔrɔ, dugukolo datugunin bena to ne la tuma bɛɛ. Nga, ka ne to dingɛba kɔnɔ, e ye ne kisi, Masaba, n ka Ala.

⁸ Ne ninakili degunna tuma min na fɔɔ a tun be ɲini ka lɔ, ne hakili jigira, ne y'a fɔ ko: ‹Masaba.› E fana ye n kaan mɛn k'i to e batoso kɔnɔ.

⁹ Mɔgɔ minw b'u jigi la joow kan, o fɛɛn fufafu nunu kan, olu te i ka dɛmɛ sɔrɔ.

¹⁰ Ne kɔni, ne bena i tanu ni dɔnkili ye, ne bena saraka bɔ i ye. Ni ne ye dajuru ta e ye koo minw na, ne bena olu kɛ. Kisili be bɔ e Masaba le fɛ.»

¹¹ O tuma na, Masaba ye sira di jigɛ ma ko a ka Zonasi fɔɔnɔ. O yɔrɔnin bɛɛ, jigɛ tagar'a fɔɔnɔ k'a bila dugukolo kan.