Yuhana 9 - ALA KA KUMA

Yezu be fiɲɛntɔcɛ dɔ ɲaa yɛlɛ

¹ Yezu tɛmɛtɔ ye cɛɛ dɔ ye min fiɲɛntɔman wolola.

² Kalandenw ye Yezu ɲininga ko: «Karamɔgɔ, mun na cɛɛ nin fiɲɛntɔman wolola? Ale yɛrɛ ka hakɛ kosɔn wa, walima a wolobagaw ta?»

³ Yezu y'u jaabi ko: «Ale ka koo tɛ, a somɔgɔw fana ka koo tɛ. Nga nin kɛra, waasa Ala ka sebagaya ka yira o sababu la.

⁴ Tile be yen tuma min na, an ka kan ka n cibaga ka baara kɛ o waati la le. Yanni dɔɔni, ni suu kora, baara te se ka kɛ tugu.

⁵ Ka ne to diɲɛ na, ne le ye diɲɛ ka yeelen ye.»

⁶ Yezu y'o kuma nunu fɔ ka ban minkɛ, a y'a daji tu duguma ka bɔgɔ nɔɔni n'o ye k'a mɔ fiɲɛntɔcɛ ɲaa na

⁷ k'a fɔ a ye ko: «Taga ko Silowe jii la.» (Silowe kɔrɔ ko ciden.) Fiɲɛntɔ nin tagara ko yen, a kɔsegitɔ, a tun be yeli kɛra.

⁸ A sigiɲɔgɔn minw tun b'a lɔn ka kɔrɔ saraka daali la, olu nan'a ye, u y'a fɔ ko: «Min tun be sigi yan ka daalili kɛ, ale tɛ wa?»

⁹ Dɔw ko ale yɛrɛ lo. Dɔw ko ale tɛ, ko u bɔra ɲɔgɔn ma le. Nga cɛɛ ko: «Ne yɛrɛ yɛrɛ lo.»

¹⁰ U y'a ɲininga ko: «Ɔnhɔn, i ɲaa do yɛlɛla cogo di?»

¹¹ A y'u jaabi ko: «U be cɛɛ min wele ko Yezu, ale lo ye bɔgɔ kɛ ka n ɲaa mɔ n'a ye ko n ka taga ko Silowe jii la. Ne tagara ko, ne ɲaa yɛlɛla.»

¹² U y'a ɲininga ko: «A be min?» A y'u jaabi ko ale m'a lɔn.

¹³ Cɛɛ min tun ye fiɲɛntɔ ye, u y'ale minɛ ka taga n'a ye *Fariziɲɛw fɛ.

¹⁴ K'a sɔrɔ lafiɲɛlon tun lo Yezu ye bɔgɔ nɔɔni ka cɛɛ ɲaa yɛlɛ n'a ye.

¹⁵ Fariziɲɛw fana ye cɛɛ ɲininga ko a ɲaa yɛlɛla cogo di. A y'u jaabi ko: «A ye bɔgɔ mɔ n ɲaa na, n ye n ɲaa ko, n be yeli kɛ sisan.»

¹⁶ Fariziɲɛ nunu dɔw y'a fɔ ko: «Ale cɛtɔgɔ nin te lafiɲɛlon bato. O tuma na, a ma bɔ Ala fɛ.» Nga dɔw ko: «Hakɛkɛla be se ka kabako nin ɲɔgɔn kɛ wa?» O yɔrɔ la, u daa fɔnna ɲɔgɔn kɔ.

¹⁷ U ye cɛɛ ɲininga tugu ko: «Cɛɛ min y'i ɲaa yɛlɛ nin, ele be mun le fɔ a ka koo la?» A y'u jaabi ko: «Cɛɛ nin ye kira le ye.»

¹⁸ O bɛɛ n'a ta, zuwifuw ma sɔn ka l'a la ko cɛɛ nin tun ye fiɲɛntɔ ye ka kɔrɔ, fɔɔ u y'a ka somɔgɔw le wele

¹⁹ k'u ɲininga ko: «Cɛɛ nin y'aw ka woloden ye wa? Aw ko a fiɲɛntɔman le wolola! A do kɛra di a be yeli kɛ sisan?»

²⁰ A wolobagaw y'u jaabi ko: «Anw kɔni y'a lɔn ko an deen lo, a fana fiɲɛntɔman le wolola.

²¹ A ɲaa yɛlɛko, an te dɔ lɔn o la. Aw k'a yɛrɛ ɲininga o la, denmisɛn tɛ, a ka kan ka se k'o ɲafɔ aw ye.»

²² A wolobagaw y'o fɔ bari u tun be siran u ka siya ɲamɔgɔw ɲa. U bɛnnin tun b'a la ko ni mɔgɔ o mɔgɔ y'a fɔ ko Yezu ye Ala ka Mɔgɔ wolomanin nin ye, k'o tigi seen tena don kalanso kɔnɔ tugu.

²³ O kama, a wolobagaw y'a fɔ k'u k'a yɛrɛ ɲininga, ko denmisɛn tɛ.

²⁴ Fariziɲɛw ye cɛɛ wele tugu k'a fɔ a ye ko: «Anw y'a lɔn ko i ɲaa yɛlɛbaga nin ye hakɛkɛla ye. Tiɲɛ fɔ an ye Ala kama.»

²⁵ A y'u jaabi ko: «Ne kɔni m'a lɔn ni hakɛkɛla lo dɛ! Ne be koo kelen dama lɔn, ne tun ye fiɲɛntɔ ye, nga sisan ne be yeli kɛ.»

²⁶ U y'a ɲininga ko: «A ye mun le kɛ i la? A y'i ɲaa yɛlɛ cogo di?»

²⁷ Cɛɛ y'u jaabi ko: «Ne tun kɔnna k'o ɲafɔ aw ye, aw m'aw tulo malɔ n fɛ. Mun na aw b'a fɛ k'o kuma kelen nin lamɛn tugu? Kɔni aw fana t'a fɛ ka kɛ a ka kalandenw ye dɛ!»

²⁸ Fariziɲɛw y'a daminɛ ka cɛɛ nɛni, u y'a fɔ a ye ko: «E le y'a ka kalanden ye. Anw kɔni ye Musa ka kalandenw ye.

²⁹ An y'a lɔn ko Ala kumana Musa fɛ. Nga nin do, an t'a bɔyɔrɔ lɔn.»

³⁰ Cɛɛ y'a fɔ u ye ko: «Aa, nin le ye kabako nin ye. Aw m'a bɔyɔrɔ lɔn k'a sɔrɔ a ye ne ɲaa yɛlɛ.

³¹ An kɔni b'a lɔn ko Ala te hakɛkɛla ka daalili jaabi. Nga mɔgɔ min be siran Ala ɲa n'a b'a sago kɛ, a b'ale lo jaabi.

³² An m'a mɛn ka ye fɔlɔ ko mɔgɔ min fiɲɛntɔman wolola, ko dɔ y'o ɲaa yɛlɛ.

³³ Ni cɛɛ nin tun ma bɔ Ala fɛ, a tun tena se ka foyi kɛ.»

³⁴ U y'a fɔ a ye ko: «Ele ye hakɛkɛla ye kabini e wolotuma, e be na lɔ yan ko i b'an kalan!» U y'a gwɛn ka bɔ kɛnɛma.

³⁵ Yezu y'a mɛn k'u y'a gwɛn minkɛ, a nan'a kunbɛn. A y'a ɲininga ko: «I lara Mɔgɔ Dencɛ la wa?»

³⁶ Cɛɛ y'a jaabi ko: «Kɔrɔ, jɔn lo, waasa ne ka l'a la?»

³⁷ Yezu ko: «I y'a ye ka ban. Ale lo be kumana i fɛ ten jaati.»

³⁸ Cɛɛ ko: «Ne lara e la Matigi.» A y'a kunbiri gwan Yezu kɔrɔ.

³⁹ O kɔ, Yezu ko: «Ne nana diɲɛ nin na kiti le kama. O la, minw ɲaa te yeli kɛ, olu ɲaa ka yɛlɛ. Minw be yeli kɛ, olu ka fiɲɛn.»

⁴⁰ Fariziɲɛ minw tun be n'a ye o yɔrɔ la k'a ka kuma nin mɛn, olu y'a ɲininga ko: «Anw fana ye fiɲɛntɔw ye wa?»

⁴¹ Yezu y'u jaabi ko: «N'aw tun fiɲɛnnin lo, hakɛ tun tena sɔrɔ aw kan. Nga aw b'a fɔ minkɛ ko aw be yeli kɛ, o kama, aw ka hakɛ b'aw kan.»