Yuhana 6 - ALA KA KUMA

Yezu be buru caya ka di jamaba ma

¹ O kɔ, Yezu tɛmɛna Galile baa faan dɔ fɛ, min be wele fana ko Tiberiyadi baa.

² Jamaba tugur'a kɔ bari u tun b'a ye n'a be kabakow kɛ ka banabagatɔw kɛnɛya.

³ O la, Yezu yɛlɛla kulu kan ka sigi n'a ka kalandenw ye.

⁴ O y'a sɔrɔ *Hɔrɔnya ɲanagwɛ tun surunyana, min ye zuwifuw ka ɲanagwɛ ye.

⁵ Yezu ko a be filɛli kɛ, a ye jamaba natɔ ye a fɛ. A y'a fɔ Filipu ye ko: «Filipu, an bena taga dumuni san min k'a di jama nin ma waasa u bɛɛ ka se ka fa?»

⁶ A kumana ten waasa ka Filipu kɔrɔbɔ. N'o tɛ, ale tun bena min kɛ, a tun b'o lɔn.

⁷ Filipu y'a jaabi ko: «Hali n'an tagara kalo seegi baara wari buru san, u bɛɛ tena dɔɔni dɔɔni sɔrɔ.»

⁸ Simɔn Piyɛri dɔgɔcɛ Andere a ka kalandenw dɔ, ale y'a fɔ a ye ko:

⁹ «Cɛdennin dɔ be yanni burukun duuru ni jigɛ deen fila ye. Nga o be mun ɲa nunu ma?»

¹⁰ Yezu y'a fɔ a ka kalandenw ye k'u k'a fɔ mɔgɔw ye u ka sigi. Biin tun ka ca yɔrɔ nin la. U sigira, cɛɛw tun ye mɔgɔ waa duuru ɲɔgɔn ye.

¹¹ O tuma na, Yezu ye buru nunu ta ka barika la Ala ye k'u tilan mɔgɔw cɛ. A ye jigɛ nunu fana kɛ ten. U bɛɛ ye sɔrɔli kɛ fɔɔ ka wasa.

¹² U bɛɛ fara minkɛ, Yezu y'a fɔ a ka kalandenw ye ko: «Aw ye buru tɔɔ bɛɛ tɔmɔ a si kana cɛn.»

¹³ O la, u ye buru tɔɔ cɛ ka segi tan ni fila fa n'o ye.

¹⁴ Mɔgɔw y'o kabako nin ye minkɛ, u ko: «Kiraba min ka kan ka na diɲɛ na dɛ, nin yɛrɛ lo!»

¹⁵ Nga, Yezu y'a lɔn k'u b'a fɛ k'ale minɛ ka sigi masaya la minkɛ, a dogora ka segi ka yɛlɛ kulu kan a kelen.

Yezu be taama jii kan

¹⁶ Suu kora, Yezu ka kalandenw jigira jida la.

¹⁷ U ye kurun dɔ ta k'u kuun sin Kafaranamu faan fɛ. Suu tun kora ka ban nga Yezu tun ma kɔsegi u fɛ.

¹⁸ Fɔɲɔba dɔ wilila, jii tora ka kurukuru.

¹⁹ U tun ye kilo duuru, walima wɔɔrɔ ɲɔgɔn taama ka ban ni kurun ye. U ye Yezu taamatɔ ye jii kan ka gwɛrɛ u ka kurun na. U siranna kosɔbɛ.

²⁰ Nga Yezu y'a fɔ u ye ko: «Aw kana siran, ne lo.»

²¹ U k'u b'a ta dɔrɔn, u y'a ye k'u sera baa dakun na u tun be tagara yɔrɔ min na.

Yezu ko ale ye dumunifɛnɲuman ye

²² O dugusagwɛ, ka jama to baa kɔ, u nana bɔ a kala ma ko kurun kelen dama le tun be yen, kalandenw dɔrɔn le tun donna o kɔnɔ ka taga. Yezu tun ma taga n'u ye.

²³ Matigi ye barika la Ala ye ka buru caya k'a di mɔgɔw ma yɔrɔ min na, kurun dɔw bɔra Tiberiyadi ka na se o yɔrɔ.

²⁴ Jama nan'a ye ko Yezu n'a ka kalandenw si te o kurun nunu kɔnɔ. O la, u donna u kɔnɔ ka taga Yezu yɔrɔ ɲini Kafaranamu.

²⁵ U tagar'a ye baa kɔ tuma min na, u y'a ɲininga ko: «Karamɔgɔ, i sera yan tuma jumɛn?»

²⁶ Yezu y'u jaabi ko: «Tiɲɛ tiɲɛ na, ne b'a fɔ aw ye ko ne ye kabako minw kɛ aw ɲana, aw te ne yɔrɔ ɲinina olu kosɔn, nga aw be ne yɔrɔ ɲinina bari aw ye buru sɔrɔ k'a ɲimi fɔɔ ka fa a la.

²⁷ Aw kana baara kɛ dumuni tolita kosɔn dɛ! Nga dumuni min te cɛn, aw ye baara kɛ o le kosɔn, min be nii banbali di. O dumuni nin, Mɔgɔ Dencɛ bena o d'aw ma. A Faa Ala y'a ka taamasiɲɛ bila ale kan.»

²⁸ U y'a ɲininga ko: «An ka kan ka mun le kɛ, waasa ka Ala sago kɛ?»

²⁹ Yezu y'u jaabi ko: «Ala ye min ci, fɔɔ aw ka la ale la. O le ye Ala sago ye.»

³⁰ Olu y'a ɲininga ko: «I be se ka kabako jumɛn kɛ k'a yira an na, waasa an be la i la? I bena mun kɛ?

³¹ An faaw ye maanɛ dumu kongokolon kɔnɔ, i ko a fɔra Ala ka kuma na cogo min na ko: ‹A ye dumuni di u ma ka bɔ sankolo la.› »

³² Yezu y'a fɔ u ye ko: «Tiɲɛ tiɲɛ na, ne b'a fɔ aw ye ko min ye dumuni di aw ma ka bɔ sankolo la, o te Musa ye. N Faa le b'a yɛrɛ yɛrɛ di aw ma ka bɔ sankolo la.

³³ Bari Ala be dumuni min di, o bɔra sankolo la ale lo be nii kura don diɲɛ mɔgɔw la.»

³⁴ U y'a fɔ Yezu ye ko: «Matigi, to k'o dumuni nin di an ma tuma bɛɛ kɛ!»

³⁵ Yezu ko u ma: «Ne le ye dumunifɛn ye min be nii kura don mɔgɔ la. Ni mɔgɔ min sɔnna ne ma, kɔngɔ t'o tigi minɛ tugu. Ni min lara ne la, minnɔgɔ t'o tigi minɛ tugu.

³⁶ Ne tun kɔnna k'a fɔ aw ye, aw y'a ye nga aw ma la ne la.

³⁷ Ni n Faa ye mɔgɔ o mɔgɔ di ne ma, o bena la ne la, ne fana tena ban o tigi la.

³⁸ Ne bɔra sankolo la ka na diɲɛ na n cibaga sago kɛli kama, n'o tɛ ne ma na n yɛrɛ sago kama.

³⁹ Ne cibaga sago ye jumɛn ye? A ye mɔgɔ minw di ne ma, ne kan'a to u si ka tunu. Nga ko ne k'u bɛɛ kunun diɲɛ labanlon na.

⁴⁰ N Faa ko ni mɔgɔ o mɔgɔ ye ne ye k'a jigi la ne kan, k'o tigi bena nii banbali sɔrɔ. Ne fana ben'a kunun labanlon na.»

⁴¹ K'a ta o tuma na, zuwifuw tora ka ŋunuŋunu a ka koo la, bari a tun ko ale ye dumunifɛn ye min bɔra sankolo la.

⁴² U tora k'a fɔ ko: «O tuma na, Yusufu dencɛ Yezu tɛ wa? An b'a faa lɔn, k'a baa lɔn! A be se k'a fɔ sisan cogo di ko ale bɔra sankolo la?»

⁴³ Yezu ye kuma ta tugu k'a fɔ u ye ko: «Aw ye ŋunuŋunu dabila aw ni ɲɔgɔn cɛ.

⁴⁴ Mɔgɔ si te se ka sɔn ne ma ni n Faa sababu tɛ. Ne fana bena o tigi kunun labanlon.

⁴⁵ A sɛbɛnnin be kiraw ka kitabuw kɔnɔ ko: ‹Ala bena u bɛɛ ladi.› Ayiwa, mɔgɔ o mɔgɔ ye mɛnni kɛ Faa Ala fɛ ka sɔn a ta ma, olu bɛɛ be la ne la.

⁴⁶ Mɔgɔ si ɲaa ma deli ka la Faa Ala kan, fɔɔ min bɔr'a fɛ ka na, ale lo y'a ye.

⁴⁷ Tiɲɛ tiɲɛ na, ne b'a fɔ aw ye ko ni min lara ne la, o tigi ye nii banbali sɔrɔ.

⁴⁸ Ne ye dumunifɛn ye min be nii banbali di mɔgɔw ma.

⁴⁹ Aw faaw ye maanɛ dumu kongokolon kɔnɔ, u bɛɛ ma sa wa?

⁵⁰ Nga dumuni min be bɔ sankolo la, ni min y'o dumu, o tigi te sa abada.

⁵¹ «Dumuni ɲanaman min bɔra sankolo la, ne lo. Ni min y'o dumu, o tigi be to nii na tuma bɛɛ. Ne bena dumuni min di, o ye ne fari yɛrɛ le ye. Ne be n yɛrɛ di waasa diɲɛ ka se ka nii banbali sɔrɔ.»

⁵² Zuwifu nunu tora ka ɲɔgɔn sɔsɔ kosɔbɛ ka to k'a fɔ ko: «Nin be se k'a fari di anw ma cogo di k'a dumu?»

⁵³ O tuma na, Yezu y'a fɔ u ye ko: «Tiɲɛ tiɲɛ na, ne b'a fɔ aw ye ko n'aw ma Mɔgɔ Dencɛ farisogo dumu k'a joli min, aw tena nii banbali sɔrɔ.

⁵⁴ Ni mɔgɔ min ye ne farisogo dumu ka ne joli min, o tigi bena nii banbali sɔrɔ, ne b'o tigi kunun labanlon na.

⁵⁵ Bari ne farisogo ye dumunifɛnsɔbɛ ye, ne joli ye minnifɛnsɔbɛ ye.

⁵⁶ Ni mɔgɔ min ye ne farisogo dumu ka ne joli min, ne be to o tigi fɛ, o tigi fana be to ne fɛ.

⁵⁷ N Faa ye n ci, ale ye nii tigi ye, ne be nii na ale barika la, o la, ni min ye ne dumu, o tigi fana bena to nii na ne barika la.

⁵⁸ Dumuni min bɔra sankolo la, ne lo. Aw faaw ye dumuni min kɛ kongokolon kɔnɔ, u bɛɛ nana sa, ne n'olu ta te kelen ye. Ni min ye ne dumu, o tigi be to nii na tuma bɛɛ.»

⁵⁹ Yezu ye mɔgɔw kalan ni kuma nunu ye kalanso dɔ kɔnɔ Kafaranamu.

Yezu ka kalanden dɔw be segi kɔ

⁶⁰ O kuma nunu mɛnnin kɔ, a ka kalandenw caaman y'a daminɛ k'a fɔ ko: «A ka kuma nunu ka gwɛlɛ dɛ! Jɔn be se ka sɔn o ma?»

⁶¹ Yezu y'a lɔn ko a ka kalandenw be ŋunuŋununa a ka kuma la minkɛ, a y'u ɲininga ko: «O ka gwɛlɛ aw fana ma wa?

⁶² Aw bena kɛ cogo di n'aw ye Mɔgɔ Dencɛ yɛlɛtɔ ye a bɔyɔrɔ la?

⁶³ Nii Senuman le b'a to mɔgɔ be barika sɔrɔ, n'o tɛ, n'a danna farisogo ta ma, o te foyi ye. Ne ye kuma minw fɔ aw ye, o be bɔ Nii Senuman fɛ ka nii don mɔgɔ la.

⁶⁴ Nga dɔw be aw cɛma minw te lara ne la.» Kabini koow daminɛwaati la, Yezu tun b'o tigiw lɔn. Min tun ben'a don mɔgɔjuguw bolo fana, a tun b'o fana lɔn ka ban.

⁶⁵ Yezu y'a fɔ tugu ko: «O le y'a to ne tun y'a fɔ aw ye ko mɔgɔ si te se ka sɔn ne ma ni n Faa sababu tɛ.»

⁶⁶ Kabin'o tuma, a ka kalandenw caaman segira kɔ, u tun te tugur'a kɔ tugu.

⁶⁷ O la, a y'a ka ciden tan ni fila nunu ɲininga ko: «Aw fana b'a fɛ ka taga wa?»

⁶⁸ Simɔn Piyɛri y'a jaabi ko: «An bena taga jɔn fɛ? Mɔgɔ be nii banbali sɔrɔ ele ka kuma barika la.

⁶⁹ Anw kɔni lara e la, an y'a lɔn fana ko i ye Ala ka mɔgɔɲuman ye a ye min ci.»

⁷⁰ Yezu y'a fɔ u ye ko: «Ne m'aw mɔgɔ tan ni fila woloma wa? O bɛɛ n'a ta, mɔgɔ kelen b'aw cɛma min ye Sutana ye.»

⁷¹ O kuma nin ɲasinnin tun be Simɔn Isikariyɔti deen Zuda le ma, ale min tun ye ciden tan ni fila nunu dɔ ye, min tun bena Yezu don mɔgɔjuguw bolo.