Yuhana 21 - ALA KA KUMA

Yezu b'a yɛrɛ yira a ka kalanden wolonwula la

¹ O kɔ fana, Yezu y'a yɛrɛ yira a ka kalandenw na tugu, Tiberiyadi bada la. A y'a yɛrɛ yira cogo min na, o filɛ.

² Simɔn Piyɛri ni Toma min tɔgɔ ko Filanin, ani Natanayɛli ka bɔ Kana, Galile mara la, ni Zebede deenw, ani Yezu ka kalanden mɔgɔ fila wɛrɛw, u tun be ɲɔgɔn fɛ.

³ Simɔn Piyɛri y'a fɔ u ye ko ale be taga mɔni kɛ. Olu y'a fɔ fana k'olu be taga n'a ye. U bɔra ka taga don kurun kɔnɔ, u y'o suu nin bɛɛ kɛ u ma jigɛ si minɛ.

⁴ Dugu gwɛra tuma min na, Yezu nana bada la, nga kalanden nunu tun m'a lɔn.

⁵ Yezu y'a fɔ u ye ko: «Hee! N teriw, jigɛ te aw fɛ wa?» U y'a jaabi ko ayi.

⁶ A y'a fɔ u ye ko: «Aw ka jɔɔ fili kurun kinibolo fɛ, aw bena sɔrɔli kɛ.» U y'a fili yen, u yɛrɛ tun te se k'u ka jɔɔ sama jigɛ cayakojugu fɛ.

⁷ Kalanden min koo tun ka di Yezu ye, ale y'a fɔ Piyɛri ye ko: «Matigi lo!» Kabini Simɔn Piyɛri y'a mɛn ko Matigi lo, a y'a ka fani ta k'a don ka sɔrɔ ka jigi jii kɔnɔ ka taga.

⁸ Kalanden tɔw tun be nana ni kurun ye n'u be jɔɔ nin samana a fanin jigɛ la, bari u yɔrɔ tun man jan baa dakun na, u furancɛ tun be ɲini ka mɛtɛrɛ kɛmɛ bɔ.

⁹ U bɔra baa kɔnɔ tuma min na, u ye tasuma mananin sɔrɔ yen ni jigɛ lanin b'a kan, ani buru.

¹⁰ Yezu y'a fɔ u ye ko: «Aw ye jigɛ minw sɔrɔ sisan sisan, aw ye na n'u ye.»

¹¹ Simɔn Piyɛri donna kurun kɔnɔ, ka jɔɔ sama ka na n'a ye bada la. A tun fanin be jigɛbaba kɛmɛ ni bi duuru ni saba la, jɔɔ n'a fako bɛɛ, a ma faran.

¹² Yezu y'a fɔ u ye ko: «Aw ye na an ka dumuni kɛ.» Kalanden si ma se k'a ɲininga ko ale ye jɔn le ye. U tun b'a lɔn ko Matigi lo.

¹³ Yezu gwɛrɛla ka buru ta, ka dɔ di u ma, a ye jigɛ fana di u ma.

¹⁴ O le tun kɛra Yezu siɲɛ sabanan ye n'a b'a yɛrɛ yira a ka kalandenw na kabini a kununna ka bɔ suuw cɛma.

Yezu be Piyɛri ɲiningana

¹⁵ U ye dumuni kɛ ka ban tuma min na, Yezu y'a fɔ Simɔn Piyɛri ye ko: «Zan dencɛ Simɔn, i be ne kanu ka tɛmɛ nunu kan wa?» A y'a jaabi ko: «Ɔnhɔn Matigi, e yɛrɛ y'a lɔn ko ne b'i kanu.» Yezu y'a fɔ a ye ko: «Ne ka sagaw dɛndɛ.»

¹⁶ O kɔ, a y'a fɔ a ye tugu a siɲɛ filanan na ko: «Zan dencɛ Simɔn, ne koo ka di i ye wa?» Piyɛri y'a fɔ a ye ko: «Ɔnhɔn Matigi, e yɛrɛ y'a lɔn ko ne b'i kanu.» Yezu y'a fɔ a ye ko: «Ne ka sagaw kɔlɔsi.»

¹⁷ O kɔ, a y'a fɔ a ye a siɲɛ sabanan na ko: «Zan dencɛ Simɔn, ne koo ka d'i ye wa?» Piyɛri hakili ɲagamina bari Yezu y'a ɲininga fɔɔ siɲɛ saba ko ale koo ka d'a ye wa. A y'a jaabi ko: «Matigi, e yɛrɛ be koo bɛɛ lɔn, e b'a lɔn ko e koo ka di ne ye.» Yezu y'a fɔ a ye ko: «Ne ka sagaw dɛndɛ.»

¹⁸ A ko: «Tiɲɛ tiɲɛ na, ne b'a fɔ i ye ko e tun ye kanbelen ye tuma min na, e tun b'i yɛrɛ cɛɛ siri. N'i tun b'a fɛ ka taga yɔrɔ min na, i tun be taga yen. Nga i mana kɛ mɔgɔkɔrɔba ye tuma min na, i bena i bolo jan mɔgɔ wɛrɛ bena i cɛɛ siri, ka taga n'i ye yɔrɔ la i t'a fɛ ka taga yɔrɔ min na.»

¹⁹ Piyɛri tun bena sa cogo min na ka boɲa la Ala kan, a tun b'a fɛ k'o le fɔ a ye. O kɔ, a y'a fɔ a ye ko: «Tugu ne kɔ.»

Zan ka seereya

²⁰ Piyɛri y'a ɲaa yɛlɛma, kalanden min koo tun ka di Yezu ye kosɔbɛ, a y'o ye, min tun y'a yɛrɛ jɛngɛ ka la Yezu disi kan dumuni tuma na, k'a ɲininga ko: «Matigi, jɔn le b'i donna bolo la?»

²¹ Piyɛri y'ale ye tuma min na, a ye Yezu ɲininga ko: «Nin do Matigi, mun le bena kɛ ale la?»

²² Yezu y'a fɔ a ye ko: «Hali ni ne b'a fɛ ale ka to yen fɔɔ ne ka kɔsegi ka na, e ka mun le b'o la? Ele kɔni, e ka tugu ne kɔ.»

²³ O kuma le kosɔn, kalandenw tora k'a fɔ ɲɔgɔn ye k'o kalanden nin tena sa tugu, nga Yezu tun m'a fɔ ko kalanden nin tena sa. A tun ko: «Hali ni ne b'a fɛ a ka to yen fɔɔ ne ka kɔsegi ka na, e ka mun le b'o la?»

²⁴ O kalanden kelen kelen le b'o koo nin fɔra aw ye, ale fana le y'o sɛbɛn. An fana do y'a lɔn ko a ka fɔta nunu ye tiɲɛ ye.

²⁵ Yezu ye koo caaman dɔ wɛrɛw kɛ, n'u kelen kelen bɛɛ tun sɛbɛnna, ne ma l'a la k'o sɛbɛ nunu marayɔrɔ tun be sɔrɔ diɲɛ na.