Yuhana 16 - ALA KA KUMA

¹ Ne ye koo bɛɛ fɔ aw ye janko aw kunna kana cɛn.

² U bena aw gwɛn ka bɔ kalansow kɔnɔ, waati dɔ bena se, mɔgɔ minw bena aw faga, olu bena miiri k'u ye Ala sago le kɛ.

³ U bena o baara sugu nunu kɛ bari u te ne lɔn, u te n Faa fana lɔn.

⁴ Ne y'o koo fɔ aw ye janko, n'a waati mana se, aw hakili ka jigi a la ko ne tun y'o fɔ aw ye ka kɔrɔ. Ne ma kɔn k'o fɔ aw ye kabini a daminɛ, bari ne tun be n'aw ye.

Nii Senuman nakun

⁵ «Sisan ne be taga ne cibaga fɛ, aw si ma ne ɲininga ko ne be taga min.

⁶ Aw hakili ɲagamina ne ka kuma nin kosɔn.

⁷ Nga ne ye tiɲɛ le fɔ aw ye. Aw kama lo ne be taga, ni ne ma taga, Dɛmɛbaga tena na aw fɛ, nga ni ne tagara, ne ben'a ci aw ma.

⁸ Ni ale nana tuma min na, a bena hakɛko ni tilenninyako, ani Ala ka kitiko gwɛya diɲɛ mɔgɔw ye, k'a yira u la k'u filila o koo nunu na.

⁹ Min ye hakɛ ye, u filila bari u ma la ne la.

¹⁰ Min ye tilenninyako ye, u filila, bari ne be taga n Faa fɛ aw tena ne ye tugu.

¹¹ Min ye kitiko ye, a ben'a yira u la ko Ala ye diɲɛ nin kuntigi kiti ka ban.

¹² Koo caaman be ne fɛ k'o fɔ aw ye, nga aw tena se k'o bɛɛ faamu sisan.

¹³ Nii Senuman min be Ala ka tiɲɛ yira mɔgɔw la, n'ale nana tuma min na, a ben'a to aw be tiɲɛ bɛɛ lɔn, bari a tena kuma a yɛrɛ barika la. Nga a mana fɛɛn o fɛɛn mɛn, ani koo min bɛɛ bena kɛ, a bena o fɔ aw ye fana.

¹⁴ A bena boɲa la ne kan, bari a mana fɛɛn min sɔrɔ ne fɛ, a bena o le fɔ aw ye.

¹⁵ Fɛɛn min ye n Faa ta ye, o bɛɛ ye ne ta ye fana, o la ne y'a fɔ ko a mana fɛɛn min sɔrɔ ne fɛ, a bena o le fɔ aw ye.»

Dusukasi bena tila ka kɛ nisɔndiya ye

¹⁶ «Yanni waati dɔɔni aw tena ne ye, o kɔ waati dɔɔni tugu aw bena tila ka ne ye.»

¹⁷ A ka kalanden dɔw tun be ɲɔgɔn ɲininga ko: «A tun b'a fɛ ka mun le fɔ an ye? Ko yanni waati dɔɔni an ten'a ye, o kɔ waati dɔɔni tugu an bena tila k'a ye. A ko tugu ko ale be ta'a Faa fɛ.»

¹⁸ U y'a fɔ k'olu ma yanni waati dɔɔni kɔrɔ faamu, a k'o kɔfɛ waati dɔɔni tugu. K'olu m'a lɔn n'a tun b'a fɛ ka fɛɛn min fɔ.

¹⁹ Yezu tun y'a lɔn k'u b'a fɛ k'ale ɲininga minkɛ, a y'a fɔ u ye ko: «Aw be ɲɔgɔn ɲiningana ne ka kuma le kɔrɔ la wa? Ne y'a fɔ minkɛ ko yanni waati dɔɔni aw tena ne ye, ani ko yanni waati dɔɔni tugu aw bena ne ye.

²⁰ Tiɲɛ tiɲɛ na, ne b'a fɔ aw ye ko, aw bena kasi fɔɔ ka kɛ makaritɔw ye, k'a sɔrɔ diɲɛ mɔgɔw be nisɔndiya la. Aw dusu bena kasi nga, aw ka dusukasi bena yɛlɛma ka kɛ nisɔndiya ye.

²¹ Ni muso be jigira deen na tuma min na, a nii be tɔɔrɔ, bari a ka tɔɔrɔwaati le sera, nga n'a jigira ka ban, a hakili te to o tɔɔrɔ la tugu deen sɔrɔ nisɔndiya fɛ.

²² Aw dusu kasinin be sisan fana, nga an bena ɲɔgɔn ye tugu, o tuma na aw bena nisɔndiya, mɔgɔ si te se ka nisɔndiya nin cɛn aw fɛ.

²³ O loon yɛrɛ la, aw tena ne ɲininga foyi si la tugu. Tiɲɛ tiɲɛ na, ne b'a fɔ aw ye ko ni aw ye fɛɛn dɔ daali n Faa fɛ ne tɔgɔ la, a bena o di aw ma.

²⁴ Fɔɔ ka na se sisan ma, aw ma foyi daali ni ne tɔgɔ ye fɔlɔ. Aw ka daalili kɛ, aw bena sɔrɔli kɛ, janko aw ka nisɔndiya ka dafa.»

Yezu le ye sesɔrɔbaga ye

²⁵ «Ne kumana aw fɛ talenw na, waati dɔ be na se, ne tena kuma aw fɛ talenw na tugu, nga ne bena n Faa koo fɔ aw ye kuma gwɛninw na.

²⁶ O loon na, aw bena Ala daali ni ne tɔgɔ ye, nga ne m'a fɔ aw ye ko ne ben'a daali aw ye dɛ.

²⁷ N Faa yɛrɛ fana b'aw kanu, bari aw ye ne kanu, ka l'a la ko ne bɔra Ala fɛ.

²⁸ Ne bɔra Faa fɛ ka na diɲɛ na, sisan fana ne be segira n Faa fɛ tugu.»

²⁹ A ka kalandenw y'a fɔ a ye ko: «Ɔnhɔn, sisan, e be kuma gwɛnin fɔra an ye, i te kumana an fɛ talen na tugu.

³⁰ Sisan, an y'a lɔn ko i be koo bɛɛ lɔn ka ban, bari hali ni mɔgɔ m'a kɔnɔnako fɔ i ye, i b'o lɔn. O le y'a to an lar'a la ko i bɔra Ala fɛ.»

³¹ Yezu y'u jaabi ko: «Aw lara ne la sisan wa?

³² Ayiwa, waati dɔ bena se, o waati nin yɛrɛ sera ka ban, aw bena jɛnsɛn, bɛɛ n'a taayɔrɔ, ka ne kelen to, nga ne tena to n kelen bari n Faa be ni n ye.

³³ Ne y'o fɔ aw ye janko aw ka to ni ne ye ka hɛrɛ sɔrɔ. K'aw to diɲɛ na, dusukasi le be aw kan, nga aw k'aw jaa gwɛlɛya, ne ye see sɔrɔ diɲɛ kan ka ban.»