Yuhana 15 - ALA KA KUMA

Yezu ko ale ye ɛrɛzɛnsun ye

¹ A y'a fɔ tugu ko: «Ne le ye *ɛrɛzɛnsunsɔbɛ ye, n Faa le y'a tigi ye.

² Bolo minw bɛɛ te deen kɛ, a bena olu tigɛ k'o bɔ yen. Ni bolo min be deen kɛ, a bena olu gɛrɛfɛ bolo misɛmanw bɔ, janko a ka se ka deen caaman kɛ ka tɛmɛ fɔlɔ kan.

³ Aw saniyara ka ban ne ka kuma kosɔn ne ye o min fɔ aw ye.

⁴ Aw ye to ni ne ye i n'a fɔ ne be n'aw ye cogo min na. Yiribolo te se ka tigɛ ka to a kelen na ka se ka deen kɛ cogo min na a yɛrɛ ma, o cogo kelen na fana, n'aw ma to ne fɛ, aw te se ka foyi kɛ.

⁵ Ne ye ɛrɛzɛnsun ye, aw y'a bolow ye. Ni mɔgɔ min tora ne fɛ, ni ne fana be a tigi fɛ, o tigi bena se ka baara caaman kɛ. Ala ye, bari ni ne sababu tɛ, aw te se ka foyi kɛ aw yɛrɛ ma.

⁶ Ni mɔgɔ min ma sɔn ka to ne fɛ, o tigi kɛra i n'a fɔ yiribolo tigɛnin, u b'a fili kɛnɛma a be ja, u b'a ta k'a don tasuma na a be jɛni.

⁷ N'aw tora ne fɛ, ani ne ka kuma tora aw kɔnɔ, aw be fɛɛn min fɛ, aw k'o daali aw bena o sɔrɔ.

⁸ Ni aw ye baara caaman kɛ, o le ben'a to n Faa be boɲa sɔrɔ, ani aw fana be kɛ ne ka kalandenw ye.

⁹ N Faa ye n kanu cogo min na, ne fana ye aw kanu ten. Aw ye to o kanuya kelen na.

¹⁰ N'aw be ne ka ciiw bato, aw fana be to ne ka kanuya la, i n'a fɔ ne be n Faa ka ciiw bato cogo min na ka to a ka kanuya la.

¹¹ Ne y'o koo nunu fɔ aw ye janko aw ka nisɔndiya sɔrɔ ne fɛ, ani aw ka nisɔndiya kosɔbɛ.

¹² «Ne ka cii ye nin ye, aw ka ɲɔgɔn kanu i n'a fɔ ne y'aw kanu cogo min na.

¹³ K'i yɛrɛ nii di i teriw kosɔn, kanuya wɛrɛ te yen min ka fisa n'o ye.

¹⁴ Aw ye ne teriw ye ni aw be sɔn ka ne ka cii bato.

¹⁵ Ne t'aw wele tugu ko baaradenw, bari baaraden t'a kuntigi ka koo kala ma. Ne b'aw wele n teriw, bari ne ye fɛɛn min bɛɛ mɛn n Faa fɛ, ne y'o bɛɛ yira aw la.

¹⁶ A ma kɛ ko aw le ye ne woloma, ne le y'aw woloma k'aw bila janko aw ka taga baara caaman kɛ, ani o baara nafa ka to, janko aw mana fɛɛn o fɛɛn daali n Faa fɛ ne tɔgɔ la, a k'o di aw ma.

¹⁷ Ne be min ɲini aw fɛ o ye nin ye: aw ka ɲɔgɔn kanu.»

Yezu ka kalandenw kɔniyakun

¹⁸ «N'aw y'a ye ko diɲɛ mɔgɔw b'aw kɔniya, aw ka l'a la ko u kɔnna ka ne le kɔniya.

¹⁹ N'aw tun ye diɲɛ ta ye, diɲɛ mɔgɔw tun bena aw kanu, nga aw te diɲɛ ta ye. Ne le y'aw woloma ka bɔ diɲɛ mɔgɔw la, o le kama, diɲɛ mɔgɔw b'aw kɔniya.

²⁰ Aw y'aw hakili jigi ne ka kuma nin na. N tun y'a fɔ aw ye ko baaraden man fisa n'a kuntigi ye. N'u ye ne tɔɔrɔ, u bena aw fana tɔɔrɔ. N'u ye ne ka kuma bato, u bena aw fana ta bato.

²¹ U bena o bɛɛ kɛ aw la ne kosɔn bari u ma ne cibaga lɔn.

²² Ni ne tun ma na ka kuma u fɛ, u tun tena jati hakɛkɛlaw ye, nga sisan yɛrɛ u ka hakɛ jatira ka ban.

²³ Mɔgɔ min be ne kɔniya, o tigi be n Faa fana kɔniya.

²⁴ Mɔgɔ wɛrɛ ma se ka koo minw kɛ, ni ne tun ma na k'o ɲɔgɔn kɛ u cɛma, u ka hakɛ tun tena kɛ u kunna, nga u y'o bɛɛ ye, o bɛɛ n'a ta, u be ne ni n Faa kɔniya tugu.

²⁵ Nga kuma min fɔra u ka sariyasɛbɛ kɔnɔ, fɔɔ o ka kɛ. A fɔra ko: ‹U ye ne kɔniya ni kuun t'a la.›

²⁶ Ne bena Dɛmɛbaga min sɔrɔ n Faa fɛ k'a ci aw ma, ale min ye Tiɲɛtigi ye, n'a nana tuma min na, a bena ne koo fɔ aw ye. Nii min be bɔ Ala fɛ.

²⁷ Aw fana, aw bena ne koo fɔ, bari aw tun be ni ne ye kabini ne ka baara daminɛ na.