Yuhana 12 - ALA KA KUMA

¹ *Hɔrɔnya ɲanagwɛ tun tora tile wɔɔrɔ, Yezu tagara Betani, Lazari ka dugu la a tun ye Lazari min sanin kunun.

² O yɔrɔ la, u ye dumuni labɛn Yezu ye. Marita le tun be dumuni dira u ma. Lazari fana tun be dumunikɛlaw cɛma.

³ Mariyamu ye daganin dɔ ta, o fanin tun be tulu kasadiman ɲanaman na, min sɔngɔ ka gwɛlɛ kosɔbɛ. A y'o bɔn Yezu seenw kan ka tila k'a kunsigi kɛ k'a seenw jɔsi, soo bɛɛ fara a kasa la.

⁴ Zuda Isikariyɔti, n'o ye kalandenw la dɔ ye, ale min ben'a don bolo la, ale y'a fɔ ko

⁵ mun na u ma tulu kasadiman nin feere warigwɛ deen kɛmɛ saba la, janko k'o wari di fantanw ma.

⁶ A tun y'o kuma nin fɔ, a ma kɛ ko fantanw makari le tun b'a la dɛ, nga soon tun lo. Ale lo tun b'u ka wari mara, ni wari min dira a ma ko a k'a mara, a b'o dumu.

⁷ Yezu y'a fɔ a ye ko: «Muso nin to ɲasuma na, a ye tulu kasadiman nin kɛ ne kan, ne suu donlon kama.

⁸ Aw bena to ni fantanw ye tuma bɛɛ, nga ne tena kɛ n'aw ye tuma bɛɛ.»

⁹ Zuwifuw caaman tun y'a mɛn ko Yezu be Betani minkɛ, u y'a daminɛ ka na yen, u tun te na Yezu dama kama, nga Lazari fana kama, a tun ye min kunun.

¹⁰ O la, sarakalasebagaw y'a latigɛ ko Lazari fana ka kan ka faga.

¹¹ Bari Lazari kosɔn zuwifuw caaman bɔra olu kɔ ka la Yezu la.

Yezu be taga Zeruzalɛmu mɔgɔbaya la

¹² O dugusagwɛ, jamaba min tun nana ɲanagwɛ nin na, olu y'a mɛn ko Yezu be nana Zeruzalɛmu.

¹³ U ye tenfuraburuw tigɛ ka bɔ ka taga kunbɛn, u tun be pɛrɛn k'a fɔ ko: «An b'i tanu! E min be nana Matigi tɔgɔ la, Isirayɛli ka masacɛ, Ala ka barika don i la.»

¹⁴ Yezu ye faliden dɔ sɔrɔ ka yɛlɛ o kan i ko a fɔra Ala ka kuma na cogo min na ko:

¹⁵ «*Siyɔnkaw, aw kana siran, aw ka masacɛ natɔ filɛ, a be faliden kan.»

¹⁶ O koo nin kɛtuma na, kalandenw tun ma kɔn k'o faamu, nga Ala ye Yezu boɲa tuma min na, u hakili sɔrɔla ka jigi a la k'o kuma nunu tun sɛbɛnna ale lo koo la. O fana le kɛra a ye.

¹⁷ Yezu ye Lazari kunun k'a wele ka bɔ kaburu kɔnɔ jama min ɲana, olu y'a koo fɔ mɔgɔw ye.

¹⁸ Jama tun b'a kunbɛnna bari u tun y'a mɛn ko a y'o kabako kɛ.

¹⁹ *Fariziɲɛw tora k'a fɔ ɲɔgɔn ye ko u tena se ka foyi ɲa tugu, ko mɔgɔ bɛɛ le be tugur'a kɔ.

Girɛki dɔw b'a fɛ ka Yezu ye

²⁰ Girɛki dɔw tun nana ɲanagwɛ nin seen fɛ janko u ka Ala bato.

²¹ U tagara Filipu fɛ min be bɔ Bɛtisayida, Galile mara la, k'a fɔ a ye ko: «N tericɛ, an b'a fɛ ka Yezu ye.»

²² Filipu tagar'a fɔ Andere fana ye, u fila bɛɛ jɛnna ka ta'a fɔ Yezu ye.

²³ Yezu y'u jaabi ko: «Mɔgɔ Dencɛ ka kan ka boɲa sɔrɔ waati min na, o le sera sisan.

²⁴ Tiɲɛ tiɲɛ na, ne b'a fɔ aw ye ko ni sumankisɛ ma toli dugukolo la, a be to a kelen, nga n'a tolila, o tuma na a be se ka kisɛ caaman kɛ.

²⁵ Mɔgɔ min b'a fɛ k'a nii kisi, o tigi bena bɔnɔ, ni mɔgɔ min t'a nii jati diɲɛ kɔnɔ, o tigi bena nii banbali sɔrɔ.

²⁶ Ni mɔgɔ min b'a fɛ ka baara kɛ ne ye, o tigi ka tugu ne kɔ, ne be yɔrɔ min na, ne ka baarakɛlaw fana bena kɛ o yɔrɔ le la. Ni mɔgɔ min be baara kɛ ne ye, n Faa bena boɲa la o tigi kan.

²⁷ Sisan ne nii tɔɔrɔnin lo, ne bena mun le fɔ? N Faa, k'a fɔ ko i ka ne kisi nin waati tɔɔrɔ ma wa? Nga ne nakun le y'o ye.

²⁸ N Faa, i k'i yɛrɛ tɔgɔ boɲa!» O waati yɛrɛ la, kumakan dɔ bɔra sankolo la, k'a fɔ ko: «Ne y'a boɲa, ne bena tila k'a boɲa tugu.»

²⁹ Jama min tun be yen, olu y'a fɔ ko saan le pɛrɛnna, dɔw ko mɛlɛkɛ dɔ le kumana a fɛ.

³⁰ Yezu y'a fɔ u ye tugu ko: «Kumakan min mɛnna, o ma kɛ ne kosɔn, a kɛra aw le kosɔn.

³¹ Diɲɛ kitiwaati sera sisan yɛrɛ, diɲɛ nin kuntigi bena gwɛn ka bila kɛnɛma.

³² Ne kɔni, ni ne kɔrɔtara sanfɛ tuma min na, ne bena mɔgɔ bɛɛ sama ka na n fɛ.»

³³ A tun b'a yɛrɛ ka sacogo le fɔra o kuma nin na.

³⁴ Jama y'a fɔ a ye ko: «An y'a mɛn sariya la ko Ala ka Mɔgɔ wolomanin nin bena to yen kudayi, e do b'a fɔ cogo di ko Mɔgɔ Dencɛ ka kan ka kɔrɔta sanfɛ? Jɔn le y'o Mɔgɔ Dencɛ ye?»

³⁵ Yezu y'u jaabi ko: «Yeelen b'aw cɛma yanni dɔɔni halibi. Tuma min na o yeelen b'aw cɛma, aw ka banba ka taama o yeelen nin na, janko suu kana ko ka bali aw la, bari mɔgɔ min be taama dibi la, o tigi t'a taayɔrɔ lɔn.

³⁶ Tuma min na yeelen b'aw cɛma, aw k'aw jigi la a kan, janko aw ka se ka kɛ mɔgɔ kɔnɔgwɛninw ye.» Yezu y'o kuma nunu fɔ u ye ka ban tuma min na, a bɔra u cɛma ka taga yɛrɛ dogo u la.

Zuwifuw ma la Yezu la

³⁷ Yezu ye kabako caaman kɛ u ɲana, o bɛɛ la u ma l'a la.

³⁸ O cogo la, kira Ezayi ye kuma min fɔ, o kɛra. A tun ko: «Matigi, jɔn le lara an ka fɔta la? Matigi y'a ka sebagaya yira jɔn na?»

³⁹ U tun te se ka l'a la kuun min na, Ezayi y'o fɔ fana ko:

⁴⁰ «Ala y'u kɛ fiɲɛntɔw ye janko u kana yeli kɛ. A y'u kɛ hakilitanw ye janko u kana faamuli kɛ. O la, Ala ko: ‹U te nimisa ka faran u ka kojuguw la, ne k'u kɛnɛya.› »

⁴¹ Ezayi y'o kuma fɔ bari a tun ye Yezu ka nɔɔrɔ ye, o la a kumana ale koo la.

⁴² O bɛɛ n'a ta, kuntigi caaman lara a la, nga *Fariziɲɛw ɲasiran kosɔn u tun te sɔn k'u yɛrɛ yira, u tun be siran ko u bena u niin bɔ kalanso koo la.

⁴³ Bari u mako tun be adamaden ka boɲa la ka tɛmɛ Ala ta kan.

⁴⁴ O tuma na, Yezu pɛrɛnna ko: «Ni mɔgɔ min lara ne la, o tigi ma la ne dama na, nga Ala min ye n ci, a lara ale la,

⁴⁵ ani mɔgɔ min ye ne ye, o tigi ye n cibaga fana ye.

⁴⁶ Ne nana diɲɛ na i n'a fɔ yeelen, janko mɔgɔ o mɔgɔ lara ne la, o tigi kana to dibi la.

⁴⁷ Ni mɔgɔ min ye ne ka kuma mɛn, n'a ma sɔn k'o bato, a ma kɛ ko ne le b'o tigi kitira, bari n ma na janko ka adamadenw kiti, nga waasa k'u kisi.

⁴⁸ Mɔgɔ min banna ne la ani a ma sɔn n ka kuma ma, o tigi kitibaga be yen, n ye kuma min fɔ, o le ben'a tigi kiti diɲɛ labanlon na.

⁴⁹ Ne ma kuma n yɛrɛ ma, nga n Faa min ye n ci ka na, ne ka kan ka kuma minw fɔ, ale lo y'o fɔ n ye.

⁵⁰ Ani ne b'a lɔn ko nii banbali be sɔrɔ o kuma nin barika la. O le y'a to n Faa ye koo nunu fɔ n ye cogo min na, n fana b'o fɔ ten.»