Yuhana 11 - ALA KA KUMA

Lazari ka sayako

¹ Cɛɛ dɔ bananin tun be Betani, Mariyamu n'a kɔrɔmuso Marita ka dugu la, a tɔgɔ ko Lazari.

² Ale Mariyamu le tun ye tulu kasadiman bon Matigi seen kan ani k'a kunsigi kɛ k'a jɔsi, ale balimacɛ Lazari le tun man kɛnɛ.

³ U ye mɔgɔ bila ka taga fɔ Yezu ye ko: «Matigi, i tericɛ man kɛnɛ.»

⁴ Yezu y'u ka kuma mɛn ka ban tuma min na, k'a fɔ ko: «Bana nin t'a fagata ye, nga a kɛra janko boɲa ka la Ala n'a Dencɛ kan.»

⁵ Marita, n'a dɔgɔmuso, ni Lazari koo tun ka di Yezu ye.

⁶ A ye Lazari ka bana koo mɛn tuma min na, a tun be yɔrɔ min na, a ye tile fila kɛ yen.

⁷ O kɔ, a y'a fɔ a ka kalandenw ye k'u ka to u be kɔsegi Zude mara la.

⁸ A ka kalandenw y'a fɔ a ye ko: «Karamɔgɔ, zuwifuw tun b'a fɛ k'i bon ni kabakuru ye a ma mɛn, e do ko an ka segi ka taga Zude mara la.»

⁹ Yezu y'u jaabi ko: «Lɛrɛ tan ni fila te tile kelen kɔnɔ wa? Ni mɔgɔ min be taama tilefɛ, a te talon, bari a be yeli kɛ tile barika la,

¹⁰ nga, ni mɔgɔ dɔ be taama sufɛ, a be talon, bari yeelen te yen.»

¹¹ O kuma bɛɛ fɔnin kɔ, a y'a fɔ u ye ko: «An tericɛ Lazari be sinɔgɔra, nga ne be taga kunun.»

¹² Kalandenw y'a fɔ a ye ko: «Matigi, n'a be sinɔgɔra, o kɔrɔ ko a bena kɛnɛya.»

¹³ Yezu tun be Lazari ka sayako le fɔra, nga kalandenw tun b'a miiri ko a tun be kumana sinɔgɔ yɛrɛ koo la.

¹⁴ O kɔ, Yezu y'a fɔ k'a gwɛ u ye ko: «Lazari sara.

¹⁵ Ne tun te yen minkɛ, o diyara ne ye, aw kosɔn, janko aw ka se ka jigi sɔrɔ. An ka taga fɛ.»

¹⁶ O la, Toma min tɔgɔ ko Filanin, ale y'a fɔ kalanden tɔ nunu ye k'u k'a to u be taga yen u bɛɛ ka sa ɲɔgɔn fɛ.

Marita ni Mariyamu be Yezu kunbɛn

¹⁷ Yezu sera tuma min na, o y'a sɔrɔ Lazari suu tun ye tile naani kɛ kaburu la.

¹⁸ Betani ni Zeruzalɛmu furancɛ tun te tɛmɛ kilo saba ɲɔgɔn kan.

¹⁹ Zuwifu caaman tun tagara Betani janko u ka se ka Marita ni Mariyamu jigi tugu u balimacɛ ka sayako la.

²⁰ Marita y'a mɛn tuma min na ko Yezu be nana, a tagar'a kunbɛn. O y'a sɔrɔ Mariyamu tun siginin be soo kɔnɔ.

²¹ Marita y'a fɔ Yezu ye ko: «Matigi, ni e tun be yan, ne balimacɛ tun tena sa.

²² Nga hali sisan ne lanin b'a la ko e mana fɛɛn o fɛɛn daali Ala fɛ, a bena o kɛ e ye.»

²³ Yezu y'a jaabi fana ko: «I balimacɛ bena kunun.»

²⁴ Marita y'a fɔ a ye tugu ko: «Ne y'a lɔn ko a bena kunun diɲɛ labanlon na.»

²⁵ Yezu y'a fɔ a ye ko: «Ne le be suuw kunun, ne be nii di, ni mɔgɔ min lara ne la hali n'o tigi sara, a bena kunun.

²⁶ Ani ka mɔgɔ o mɔgɔ to nii na, n'a lara ne la, a tena sa fewu. I lara o la wa?»

²⁷ A y'a jaabi ko: «Ɔnhɔn Matigi, ne lanin b'a la ko e le ye Ala ka Mɔgɔ wolomanin nin ye, Ala Dencɛ, min ka kan ka na diɲɛ na.»

²⁸ A y'o kuma nunu fɔ ka ban dɔrɔn, a tagara Mariyamu wele dogo la k'a fɔ ale ye ko: «Karamɔgɔ nana, a ko i ka na.»

²⁹ Mariyamu y'o mɛn dɔrɔn, a sinna ka wili ka taga Yezu fɛ.

³⁰ O y'a sɔrɔ Yezu ma don dugu kɔnɔ fɔlɔ. Marita tun y'a kunbɛn yɔrɔ min na, a tun b'o yɔrɔ la halibi.

³¹ Zuwifu minw tun be ni Mariyamu ye soo kɔnɔ k'a jigi tugu, olu y'a ye a sinna ka wili ka bɔ dɔrɔn, olu tugura a kɔ. U tun b'a miiri ko a be tagara kaburu yɔrɔ la ka kasi.

³² Mariyamu sera Yezu fɛ dɔrɔn, a y'a kunbiri gwan a kɔrɔ k'a fɔ a ye ko: «Matigi, ni e tun be yan, ne balimacɛ tun tena sa.»

³³ Yezu y'ale ni zuwifuw kasitɔ ye, o y'a dusu kasi, u makari y'a minɛ.

³⁴ A y'u ɲininga ko: «Aw y'a suu don yɔrɔ jumɛn?» U ko: «Matigi, na taga o yɔrɔ filɛ.»

³⁵ Yezu kasira.

³⁶ O la, zuwifu minw tun be yen, olu y'a fɔ ko a koo tun ka d'a ye dɛ.

³⁷ Nga dɔw y'a fɔ ko: «Ale min tun ye fiɲɛntɔ ɲaa yɛlɛ, a tun te se ka Lazari bali saya ma wa?»

Yezu be Lazari kunun

³⁸ Yezu dusu kasira tugu, a tagara kaburu yɔrɔ la. Kaburu nin tun ye farawo ye, u ye kabakuru kɛ k'a datugu.

³⁹ Yezu y'a fɔ ko u ka kabakuru bɔ kaburuda la. Cɛɛ min banna, ale balimamuso Marita y'a fɔ a ye ko: «Matigi, a kasa ka kan ka bɔ sisan, bari a suu donna bii y'a tile naani ye.»

⁴⁰ Yezu y'a fɔ a ye ko: «Ne tun m'a fɔ i ye ko ni lanaya b'i la, ko i bena Ala ka sebagaya ye wa?»

⁴¹ U ye kabakuru bɔ yen, o kɔ Yezu y'a ɲaa kɔrɔta sanfɛ k'a fɔ ko: «N Faa, ne be barika la i ye bari i ye ne jaabi.

⁴² Ne y'a lɔn ko i be ne jaabi tuma bɛɛ, nga ne b'o fɔra janko mɔgɔ minw be ne lamini na, olu ka l'a la ko ele le ye ne ci.»

⁴³ A y'o kuma fɔ ka ban tuma min na, a pɛrɛnna ko: «Lazari, wili ka bɔ.»

⁴⁴ Lazari min tun sara, a kununna ka bɔ kaburu la. Fani melekenin tun b'a bolo n'a seen na, ani dɔ tun kɛnin be k'a ɲaa siri. Yezu y'a fɔ u ye ko: «Aw k'a foni k'a to a ka taga.»

U b'a fɛ ka Yezu faga

⁴⁵ Zuwifu minw tun nana Mariyamu fɛ, u ye Yezu ka koo kɛnin ye minkɛ, u caaman lara a la.

⁴⁶ Nga dɔw tagara *Fariziɲɛw fɛ, Yezu ye koo min kɛ, k'o lakali u ye.

⁴⁷ Sarakalasebagaw ni Fariziɲɛw ye ɲɔgɔnye kɛ k'a fɔ ko: «An bena mun le kɛ? Bari cɛɛ nin be kabako caaman kɛ.

⁴⁸ N'an y'a to n'a tagara ɲa, mɔgɔ bɛɛ bena l'a la, o seen fɛ, Ɔrɔmukaw bena na k'an ka yɔrɔ senuman n'an ka siya halaki.»

⁴⁹ Sarakalasebagaw kuntigiba min tun be yen o saan na, a tɔgɔ ko Kayifu, ale y'a fɔ u ye ko: «Aw te foyi faamu.

⁵⁰ Aw fana m'a lɔn ko mɔgɔ kelen ka sa jama kosɔn janko an ka siya bɛɛ kana halaki, k'o ka fisa wa?»

⁵¹ O kuma nin ma bɔ a yɛrɛ la, o saan nin na, ale lo tun ye sarakalasebagaw kuntigiba ye, a tun ye kirayakuma le fɔ ten ko Yezu ka kan ka sa zuwifu siya kosɔn.

⁵² O fana tun te kɛ u ka siya dama kosɔn, nga Ala deenw minw jɛnsɛnnin be, a ka se k'olu lajɛn.

⁵³ Kabini o loon, u bɛnn'a la k'u ben'a faga.

⁵⁴ O le kosɔn Yezu tagara kongokolon faan fɛ dugudennin dɔ la min tɔgɔ ko Efarayimu. A n'a ka kalandenw tora o yɔrɔ la. A tun te sɔn ka taga zuwifuw cɛma tuma bɛɛ.

Tulu kasadiman bonko Yezu seen kan

⁵⁵ O waati la, zuwifuw ka *Hɔrɔnya ɲanagwɛ loon tun sera ka ban. A tɔɔ tun tora tile damani, mɔgɔ caaman tun be bɔ dugudenninw na ka na Zeruzalɛmu janko k'u yɛrɛ saniya ka kɛɲɛ n'u ka landa ye.

⁵⁶ Olu tun be Yezu yɔrɔ yaalala. K'u to Alabatosoba kɔnɔ, u b'a fɔra ɲɔgɔn ye k'o tuma na, a tena na ɲanagwɛ nin na wa?

⁵⁷ Sarakalasebagaw ni *Fariziɲɛw tun y'a fɔ ko ni mɔgɔ min ye Yezu yɔrɔ lɔn, k'u k'a yɔrɔ yira olu la, u be taga minɛ.