Yowɛli 4 - ALA KA KUMA

Siya wɛrɛw kitiko

¹ «Tiɲɛ na, o waati la, ne bena Zeruzalɛmu dugu ni Zuda mara lalaga tugu.

² Ne bena siya wɛrɛw bɛɛ lajɛn, n bena jigi n'u ye ne Masaba ka Kititigɛkɛnɛ na. N bena u kiti yen ne ka jama Isirayɛli ka koo kama, olu minw ye ne ta ye. Bari, u ye ne ka jama jɛnsɛn siyaw cɛma, ka ne ka jamana tilan.

³ U ye kala la ka ne ka jama tilan u ni ɲɔgɔn cɛ. U ye kanbelenninw falen ni tutumusow ye, u ye sunguruninw feere, ka duvɛn min n'o wari ye.

⁴ «Tiri ni Sidɔnkaw, ani filisiw ka maraw mɔgɔw bɛɛ, aw b'a fɛ ka mun kɛ ne la? Aw b'a fɛ k'aw mɔnɛ bɔ ne la le wa? N'o lo, ne bena aw ka kɛtaw ɲɔgɔn segi aw ma joona joona.

⁵ Aw minw ye ne ka warigwɛ ni n ka sanu cɛ, ka taga u bila aw ka jobonw kɔnɔ.

⁶ Aw ye Zeruzalɛmukaw ni Zuda mara mɔgɔw feere girɛkiw ma, waasa k'u yɔrɔ jaɲa u ka jamana na.

⁷ «Ayiwa, ne bena u wele ka bɔ u feereyɔrɔ la. Ne bena aw ka kɛwaliw juru sara aw la.

⁸ Ne bena aw dencɛw ni aw denmusow feere Zuda mara mɔgɔw ma. Olu bena u feere Sabakaw ma, olu minw be fɔɔ yɔrɔjan.» Masaba le ko ten.

Kɛlɛ laban, ani kiti

⁹ Aw k'a fɔ siya wɛrɛw ye ko: «Aw k'aw yɛrɛ labɛn kɛlɛ kama! Aw ka cɛfariw wele kɛlɛ la! Kɛlɛdenw bɛɛ ka gwɛrɛ, ka taama daminɛ.

¹⁰ Aw k'aw ka misidabaw yɛlɛma k'u kɛ murujanjanw ye, k'aw ka wɔrɔsɔw yɛlɛma k'u kɛ tamanw ye. Barikatan k'a fɔ ko: ‹Ne ye barikatigi ye!›

¹¹ Aw ye teliya ka na, aw, gɛrɛfɛ jamanaw bɛɛ, aw ye lajɛn yen. Masaba, i ka cɛfariw bila ka jigi!

¹² Siya wɛrɛw ka wili, ka taama daminɛ, ka to ka taga ne Masaba ka Kititigɛkɛnɛ na. N bena sigi yen le ka gɛrɛfɛ siyaw bɛɛ kiti.

¹³ Aw k'aw ka wɔrɔsɔw ta, bari suman mɔna. Aw ye na *ɛrɛzɛn nɔɔni, bari a jii bɔyɔrɔ fara, minanw fara tɛ! Tiɲɛ na, u ka juguya daan tɛmɛna!

¹⁴ Jamaba le be Kititigɛkɛnɛ na. Bari Masaba ka loon surunyana Kititigɛkɛnɛ na.

¹⁵ Tile ni kalo bena dibi, lolow tena yeelen bɔ tugu.

¹⁶ Masaba bena pɛrɛn *Siyɔn, a sɔngɔkan bena bɔ Zeruzalɛmu. Sankolo ni dugukolo bena yɛrɛyɛrɛ. Nga a bena kɛ a ka mɔgɔw tangabaga ye, a bena kɛ Isirayɛlidenw dogoyɔrɔ ye.

¹⁷ Aw ben'a lɔn o tuma na ko ne ye Masaba ye, aw ka Ala. Ko ne be n ka kulu Siyɔn kan. Zeruzalɛmu bena kɛ ne ka yɔrɔ ye, lonanw ka kɛlɛdenw tena na don yen tugu.

Zuda mara bena kɛ hɛrɛyɔrɔ ye

¹⁸ «O waati la, *ɛrɛzɛnsunw bena den kuluw kan kosɔbɛ, begɛnw bena nɔnɔ di kosɔbɛ. Jii bena woyo Zuda mara kɔɔw bɛɛ kɔnɔ, jii bena bɔ Masaba ka soo kɔnɔ ka taga Akasiya kɔkɛnɛ ɲigi.

¹⁹ Ezipiti jamana bena kɛ yɔrɔlakolon ye, Edɔmu mara bena kɛ yɔrɔ janin ye. Bari u ye fariyakow kɛ Zuda mara mɔgɔw la, u ye jalakibaliw faga u ka jamana kɔnɔ.

²⁰ Nga Zuda mara bena kɛ mɔgɔw sigiyɔrɔ ye waati bɛɛ, mɔgɔw bena sɔrɔ Zeruzalɛmu kɔnɔ tuma bɛɛ.

²¹ Ne bena u mɔnɛ bɔ, ne tena o yafa. Ne le ko ten.» Masaba sigiyɔrɔ bena kɛ *Siyɔn!