Yowɛli 1 - ALA KA KUMA

Tɔɔn ni jaa bena jamana cɛn

¹ Masaba ye kuma min fɔ Petuyɛli dencɛ Zowɛli ye, o filɛ.

² Cɛkɔrɔbaw, aw ye tulo malɔ nin na! Jamana mɔgɔw bɛɛ ka mɛnni kɛ! Koo nin ɲɔgɔn kɛra ka ye aw ka tile la wa? A ɲɔgɔn kɛra ka ye aw faaw ka tile la wa?

³ Aw k'a lakali aw deenw ye, olu fana k'a lakali u deenw ye, olu fana k'a lakali u deenw ye.

⁴ Tumu tagara ka min to, burunburun y'o ɲimi. Burunburun tagara ka min to, tɔnmisɛnw y'o cɛn. Tɔnmisɛnw tagara ka min to, tɔnwulenw y'o halaki.

⁵ Aw ye wili ka kasi, dɔrɔtɔ nunu! Aw ye kasi kosɔbɛ, aw dɔrɔminlaw bɛɛ! *Ɛrɛzɛn cɛnna, duvɛnkɛnɛ ma sɔrɔ.

⁶ Siya dɔ nana don ne ka jamana kɔnɔ. U ka ca, barika b'u la! U ɲiiw be i ko jaraw ta, u yewagaw ni jaramusow ta bɛɛ ye kelen ye.

⁷ U ye ne ka ɛrɛzɛnsunw halaki, u ye n ka torosunw cɛn pewu k'u fara bɔ k'a fili k'u bolow lakolon to gwɛman gwɛman.

⁸ Aw ye kasi i ko sunguru min maminɛcɛ sara, aw ka dusukasifani don!

⁹ Suman sarakaw ni jii te ye Masaba ka soo kɔnɔ tugu. Sarakalasebagaw be dusukasi la, olu minw be baara kɛ Masaba ye.

¹⁰ Forow cɛnna, dusukasi be kongo la. Sumanw halakira, ɛrɛzɛn cɛnna, tulu te sɔrɔla fana.

¹¹ Sɛnɛkɛlaw hakili ɲagamina, yiriforotigiw be kasira kosɔbɛ Sumanw tununa, foro kɔnɔ fɛɛnw bɛɛ cɛnna.

¹² Ɛrɛzɛnsunw fɔnsɔnfɔnsɔnna, torosunw ni gerenadiyiriw jara, tamarosunw ni sunsunw jara, yiriw bɛɛ jara forow kɔnɔ. Nisɔndiya banna adamadenw cɛma.

Mɔgɔw ka Masaba daali

¹³ Sarakalasebagaw, aw ka dusukasifaniw don ka kasi. Aw minw be baara kɛ sarakabɔyɔrɔ la, aw ka kasi kosɔbɛ. Aw minw bɛɛ be baara kɛ ne ka Ala ye, aw ka si ni dusukasifaniw ye aw kaan na. Bari, suman sarakaw ni jii te sɔrɔla aw ka Ala ka soo kɔnɔ tugu.

¹⁴ Aw ka sundonko wango la. Ka ɲɔgɔnyeba loon sigi ka Ala boɲa. Aw ka cɛkɔrɔbaw lajɛn, ni jamana mɔgɔw bɛɛ, Masaba aw ka Ala ka soo kɔnɔ. Aw ka kule Masaba nɔɔ fɛ.

Masaba ka dimi loon

¹⁵ Ee! O ye loon jumɛn ye sa? Masaba ka loon surunyana, a bena na i ko halakifɛn, ka bɔ Setigi fɛ.

¹⁶ Suman cɛnna an ɲana, nisɔndiya dɛsɛra an ka Ala ka soo kɔnɔ.

¹⁷ Sumankisɛ sara dugukolo kɔnɔ. Suman marayɔrɔw cɛnna, bondow lakolon lo. Bari, suman ma ɲa.

¹⁸ Begɛnw be kasira, misiw be taamana u kunfɛ, bari dumunikɛyɔrɔ te yen. Hali begɛnmisɛnw ɲaa be gwanna.

Kira ka daalili

¹⁹ Masaba, ne be kulera ele le nɔɔ fɛ, bari, tasuma ye lɛɛw jɛni, tasuma ye foro kɔnɔ yiriw bɛɛ jɛni.

²⁰ Hali kongosogow be kasira i nɔɔ fɛ. Bari, jiyɔrɔw jara, tasuma ye lɛɛw halaki.