Yosuwe 4 - ALA KA KUMA

Kabakuru tan ni fila ka koo

¹ Jama bɛɛ tɛmɛna ka ban Zurudɛn baji kɔfɛ tuma min na, Masaba y'a fɔ Zozuwe ye ko

² a ka mɔgɔ tan ni fila woloma k'u bɔ jama cɛma, sokala o sokala mɔgɔ kelen.

³ Ko a k'a fɔ olu ye ko u ka kabakuru deen tan ni fila ta, sarakalasebaga nunu lɔyɔrɔ la baa dingɛ cɛmancɛ la, ka taga ni o kabakuru nunu ye k'u bila u ka layɔrɔ la.

⁴ Zozuwe ye mɔgɔ tan ni fila nunu wele, a tun ye minw woloma ka bɔ Isirayɛlidenw cɛma, mɔgɔ kelen kelen sokalaw bɛɛ la,

⁵ k'a fɔ u ye ko: «Aw ye tɛmɛ Masaba aw ka Ala ka layidu taamasiɲɛ kɛsu ɲafɛ Zurudɛn baji cɛmancɛ la, aw kelen kelen bɛɛ ka kabakuru ɲun k'a bila aw gaman kan ka kɛɲɛ ni Isirayɛlidenw ka sokalaw daa ye,

⁶ janko o ka kɛ taamasiɲɛ ye aw fɛ. Loon min na n'aw deenw y'aw ɲininga ko nin kabakuru nunu kɔrɔ ye mun le ye,

⁷ o tuma na, aw bena to k'u jaabi ko u tun be Zurudɛn baji tigɛra tuma min na ni Masaba ka layidu taamasiɲɛ kɛsu ye, ko Zurudɛn baji tun tigɛra ka lɔ. A kɛra ten, kabakuru nunu bena kɛ hakilijigifɛn ye Isirayɛlidenw fɛ tuma bɛɛ.»

⁸ Zozuwe tun ye min fɔ Isirayɛlidenw ye, u y'o kɛ. U ye kabakuru tan ni fila ta Zurudɛn baji dingɛ cɛmancɛ la ka kɛɲɛ ni Isirayɛlidenw ka sokalaw daa ye i ko Masaba tun y'a fɔ Zozuwe ye cogo min na. U y'u ta ka taga u bila u layɔrɔ la.

⁹ Zozuwe ye kabakuru tan ni fila ta k'u koori ɲɔgɔn kan Zurudɛn baji dingɛ cɛmancɛ la, Ala ka layidu taamasiɲɛ kɛsu tabagaw lɔyɔrɔ la. Kabakuru nunu be yen halibi.

¹⁰ Sarakalasebaga minw ye kɛsu nin ta, olu lɔra Zurudɛn baji dingɛ cɛmancɛ la, fɔɔ jama ye Masaba ka fɔta bɛɛ kɛ ka ban, a tun ye min fɔ Zozuwe ye, i ko Musa tun y'a fɔ a ye cogo min na. O kɔ, jama bɛɛ banbana ka baa nin tigɛ.

¹¹ Jama bɛɛ tigɛra ka ban tuma min na, kɛsu nin n'a tabagaw bɔra ka bila jama ɲafɛ.

¹² Urubɛn kɔmɔgɔw ni Gadi kɔmɔgɔw ani Manase kɔmɔgɔw tilancɛ kelen bilara Isirayɛliden tɔw ɲafɛ n'u ka kɛlɛkɛminanw ye, i ko Musa tun y'a fɔ u ye cogo min na.

¹³ Kɛlɛden minw tun ye Zurudɛn baji tigɛ Masaba ɲakɔrɔ Zeriko kɛnɛba la, olu tun be mɔgɔ waa bi naani ɲɔgɔn bɔ.

¹⁴ O loon na, Masaba ye Zozuwe boɲa kosɔbɛ Isirayɛlidenw bɛɛ ɲakɔrɔ, u tun sirann'a ɲa i n'a fɔ u tun be siran Musa ɲa cogo min na a sii bɛɛ la.

¹⁵ O kɔ, Masaba y'a fɔ Zozuwe ye ko:

¹⁶ «A fɔ sarakalasebagaw ye minw be ne ka layidu taamasiɲɛ kɛsu ta, k'u ka bɔ baa dingɛ nin kɔnɔ.»

¹⁷ Zozuwe y'a fɔ sarakalasebaga nunu ye k'u ka bɔ baa dingɛ nin kɔnɔ.

¹⁸ U bɔra baa dingɛ cɛmancɛ la ni kɛsu nin ye ka na se kɛnɛma. U seen bilatɔ kɛnɛma, baji segir'a nɔɔ na ka yɔrɔ bɛɛ fa fɔɔ ka se baa dagolo la.

¹⁹ Jama tun ye Zurudɛn baji tigɛ saan kalo fɔlɔ tile tannan loon, ka na sigi Giligali, Zeriko kɔrɔn ɲafan fɛ.

²⁰ U tun ye kabakuru tan ni fila minw ta Zurudɛn baji dingɛ kɔnɔ, Zozuwe ye olu minɛ k'u bila ɲɔgɔn kan Giligali.

²¹ O kɔ, a y'a fɔ Isirayɛlidenw ye ko: «Loon min na n'aw deenw ye u wolobagaw ɲininga ko kabakuru nunu kɔrɔ ye mun ye,

²² aw k'a fɔ u ye ko: ‹Zurudɛn jii tun tigɛra, Isirayɛlidenw donn'a dingɛ kɔnɔ k'a tigɛ, a janin.›

²³ Bari Masaba aw ka Ala tun ye Zurudɛn baji kɛ a tigɛra, aw bɛɛ tɛmɛna, i n'a fɔ a tun ye Buruku kɔgɔji kɛ cogo min na k'a tigɛ, an bɛɛ tɛmɛna.

²⁴ O la, dugukolo kan siyaw bɛɛ ka se k'a lɔn ko fanga be Masaba bolo, aw fana ka se ka siran Masaba aw ka Ala ɲa tuma bɛɛ.»