Yosuwe 2 - ALA KA KUMA

Zozuwe be mɔgɔ fila ci Zeriko

¹ O kɔ, Nun dencɛ Zozuwe ye yɔrɔkɔlɔsibaga mɔgɔ fila ci dogo la k'u to Sitimu. A ko: «Aw ye taga jamana nin yaala, ka Zeriko dugu filɛ ka ɲa.» U tagara se kakalamuso dɔ ka soo, a tɔgɔ ko Araabu. U donna yen ka jigi ale fɛ.

² Mɔgɔ dɔw tagar'a fɔ Zeriko masacɛ ye ko: «Mɔgɔ dɔw bɔra Isirayɛlidenw fɛ ka na dugu nin kɔnɔ yan bii suu nin na, u b'a fɛ ka jamana nin koow lɔn.»

³ O la, Zeriko masacɛ ye mɔgɔw bila ka n'a fɔ Araabu ye ko mɔgɔ minw jigir'a fɛ n'u b'a ka soo, ko a k'u gwɛn ka bɔ, bari u nana janko ka se ka jamana nin koow bɛɛ lɔn.

⁴ Muso nin tun ye ciden mɔgɔ fila nunu dogo. A y'a fɔ ko: «Tiɲɛ lo, mɔgɔ nunu sera ne fɛ, nga ne tun m'a lɔn u bɔra yɔrɔ min na.

⁵ U tun be dugu donda tugura sufɛ tuma min na, mɔgɔ nunu bɔra o tuma le la. Ne ma u taayɔrɔ lɔn. Aw ye banba, aw bena u sɔrɔ sira la.»

⁶ Nga a tun tagara ni mɔgɔ fila nunu ye sanbon kan, k'u dogo kala jukɔrɔ, a tun ye min cɛ ka na bila o yɔrɔ la.

⁷ Sira min be taga Zurudɛn baji tigɛ, masacɛ ka ciden nunu y'o minɛ, ko u be tugu mɔgɔ fila nunu kɔ. U bɔnin kɔ dɔrɔn, u ye dugu donda tugu.

⁸ Yanni yɔrɔkɔlɔsibaga nunu ka sinɔgɔ, Araabu yɛlɛla u fɛ sanbon kan

⁹ k'a fɔ u ye ko: «Ne kɔni y'a lɔn ko Masaba ye jamana nin di aw ma, o la siranya ye an minɛ kosɔbɛ ka ban, fɔɔ jamanadenw bɛɛ be yɛrɛyɛrɛla aw kosɔn.

¹⁰ Bari Masaba ye koo minw kɛ aw bɔtɔ Ezipiti jamana na, an y'o mɛn. A y'a kɛ Buruku kɔgɔji tigɛra aw ɲa, aw ye min kɛ amoriw ka masacɛ fila la, k'u halaki pewu Zurudɛn baji kɔfɛ, an y'o mɛn. Olu minw ye Siŋɔn ni Ɔgi ye.

¹¹ An y'o mɛn tuma min na, o ye an jaa tigɛ, fɔɔ an hakili bɛɛ cɛnna aw ka koo la, bari Masaba aw ka Ala ye Ala ye sankolo la ani dugukolo kan.

¹² Sisan ne b'aw daali ko aw ka kali ne ye Masaba tɔgɔ la, ne ye koɲuman min kɛ aw ye, ko aw bena o ɲɔgɔn kɛ ne ka somɔgɔw ye. Aw ka taamasiɲɛ dɔ yira ne la

¹³ ko aw tena na ne facɛ ni n bamuso ni n badenw faga, ani fɛɛn o fɛɛn kɛra u ta ye, ko aw bena sɔn ka olu kisi saya ma.»

¹⁴ Mɔgɔ nunu y'a fɔ a ye ko: «An kɔni labɛnnin be hali ka sa ele n'i ka somɔgɔw kosɔn. N'i sɔnna k'an sutara, ni Masaba nana jamana nin di an ma tuma min na, an bena koɲuman kɛ i ye fana ka kɛ kantigiw ye.»

¹⁵ O kɔ, a y'u dɛmɛ ka bɔ ni fenɛtiri ye ka jigi ni juru ye dugu kɔfɛ, bari muso nin ka soo tun nɔrɔnin be dugu laminikogo la.

¹⁶ A y'a fɔ u ye ko u ka banba ka taga kuluyɔrɔ la, janko u kana u kɔɔ gwɛnbagaw kunbɛn, k'u ka dogo kuluwo nin kɔnɔ fɔɔ tile saba, fɔɔ n'u kɔɔ gwɛnbaga nunu kɔsegira tuma min na, k'o kɔ, u be sɔrɔ k'u ka sira ta ka taga.

¹⁷ Mɔgɔ nunu y'a fɔ a ye ko: «I y'a kɛ an kalila koo min na, an bena o kɛ cogo min na, o filɛ:

¹⁸ N'an donna jamana nin kɔnɔ tuma min na, e y'an dɛmɛ ka bɔ ni fenɛtiri min ye, i ka jese wulenman nin siri o la. E k'i facɛ, n'i bamuso, n'i kɔrɔw n'i dɔgɔw, ani i ka somɔgɔw bɛɛ wele u ka na to i ka soo kɔnɔ.

¹⁹ N'u dɔ bɔra i ka soo kɔnɔ ka taga kɛnɛma, o tigi hakɛ bena to a yɛrɛ kunna, an seen tena sɔrɔ o la. Nga ni an ye u dɔ faga n'a be i ka soo kɔnɔ, o tigi hakɛ be anw le kan.

²⁰ N'i fana ye an koo fɔ dugu mɔgɔw ye fana, an tena jalaki sɔrɔ an ka kalili nin la tugu.»

²¹ A y'a fɔ u ye ko: «Aw y'a fɔ cogo min na, a ka kɛ ten.» O kɔ, a ye sira di u ma, u bɔra ka taga. A ye jese wulenman nin ta k'a siri fenɛtiri nin na.

²² U bɔra ka taga se kuluw yɔrɔ la, ka to o yɔrɔ la tile saba fɔɔ u kɔɔ gwɛnbagaw y'u yaala yɔrɔ bɛɛ la sira kan ka dɛsɛ ka kɔsegi.

²³ O kɔ, ciden fila nunu bɔra kulu kan ka jigi. U tagara Zurudɛn baji tigɛ ka taga se Nun dencɛ Zozuwe fɛ. Koo minw kɛra u la, u y'o bɛɛ fɔ a ye.

²⁴ U y'a fɔ Zozuwe ye ko: «Tiɲɛ na, Masaba ye jamana nin bɛɛ don an bolo, fɔɔ jamana mɔgɔ nunu bɛɛ be yɛrɛyɛrɛ an kosɔn.»