Yirari 13 - ALA KA KUMA

Sogo min bɔra kɔgɔji la o batoko

¹ N ye Sogo dɔ bɔtɔ ye kɔgɔji la, a kungolo ye wolonwula ye, a gɔɔn ye tan ye. Masafugulan b'a gɔɔn nunu kelen kelen bɛɛ la. Ala tɔgɔcɛn kuma sɛbɛnnin b'a kuun kelen kelen bɛɛ kan.

² O Sogo nin bɔnin be waraninkala fɛ. A seenw tun be i n'a fɔ surukuwulen ta. A dakala be i n'a fɔ jara ta. Sogojugu nin y'a ka sebagaya n'a ka masaya ani fangaba d'a ma.

³ Sogo nin kungolo kelen mandiminin tun lo kosɔbɛ i n'a fɔ a bena sa. Nga a kuun nin nana suma. Adamadenw kabakoyara kosɔbɛ ka tugu a kɔ.

⁴ U ye Sogojugu nin bato bari a ye sebagaya di Sogo dɔ nin ma. U tora ka Sogo dɔ nin bato n'u b'a fɔ ko: «Batofɛn jumɛn ni Sogo nin ka kan? Jɔn be se ka lɔ a ɲa kɛlɛ la?»

⁵ Daa dir'a ma waasa ka to k'a yɛrɛ wanso ani ka Ala tɔgɔ cɛn. Fanga dir'a ma waasa a k'a seko kɛ kalo bi naani ni fila kɔnɔ.

⁶ A y'a daminɛ ka Ala tɔgɔ cɛn, ka arijana lɔgɔbɔ, min ye Ala sigiyɔrɔ ye, ka to ka arijana mɔgɔw bɛɛ nɛni.

⁷ Sira dir'a ma ko a ka Krista ka jama kɛlɛ, ani ka se u kɔrɔ. Fanga dir'a ma waasa ka siyaw bɛɛ mara, ni jamanaw bɛɛ.

⁸ U tun ye Sagaden min faga kabini diɲɛ dantuma, mɔgɔ minw tɔgɔ te nii banbali sɛbɛ kɔnɔ, olu bɛɛ bena sogo nin bato.

⁹ «Ni min b'a fɛ ka faamuli kɛ, o k'a tulo malɔ ka ɲa.

¹⁰ Mɔgɔ min danna jɔnya kama, o tigi bena jɔnya kɛ. Ni min ka kan ka faga ni murujan ye, o tigi bena faga ten. O la, Krista ka jama ka kan ka kɛ muɲubagaw ni jigitigiw ye.»

Sogo wɛrɛ batoko

¹¹ O kɔ, n ye Sogo wɛrɛ ye min be bɔra dugukolo la. Gɔɔn fila tun b'a la i n'a fɔ saga ta. A be kuma i n'a fɔ sogojugu.

¹² A ye diɲɛ mɔgɔw bɛɛ karaba k'u kɛ Sogo fɔlɔ nin batobagaw ye, Sogo fɔlɔ nin barika la, min tun mandiminin b'a kuun na.

¹³ O Sogo nin ye kabakobabaw kɛ, a ye tasuma yɛrɛ jigi ka bɔ sankolo la mɔgɔ bɛɛ ɲana.

¹⁴ Sebagaya min dir'a ma, a y'o ta ka kabakow kɛ ka mɔgɔ caaman lafili Sogo fɔlɔ nin ɲana. A y'a fɔ mɔgɔw ye k'u ka Sogo fɔlɔ nin jaa dilan k'a boɲa, Sogo min tun mandimina n'a ma sɔrɔ ka sa.

¹⁵ Sira dir'a ma ko a ka nii don jaa nin na, waasa a ka kuma, ni mɔgɔ min banna k'ale jaa nin bato, a k'o tigi faga fana.

¹⁶ Sogo nin ye mɔgɔw bɛɛ wajibiya ka taamasiɲɛ dɔ bila u kinibolo kan walima u teen na: denmisɛn fara mɔgɔkɔrɔbaw kan, nafolotigiw ni fantanw, jɔɔnw ni hɔrɔnw bɛɛ.

¹⁷ Ni Sogo nin ka taamasiɲɛ, min y'a tɔgɔ ye, walima nimɔrɔ min be bɛn a tɔgɔ ma, n'o te mɔgɔ min kan, o tigi te se ka foyi san, a te se ka foyi feere.

¹⁸ Fɔɔ i ka kɛ hakilitigi ye yan. Nimɔrɔ min be bɛn Sogo nin tɔgɔ ma, ni min ye lɔnnikɛla ye, o tigi k'o jati minɛ. O nimɔrɔ be bɛn mɔgɔ tɔgɔ ma. O ye kɛmɛ wɔɔrɔ ni bi wɔɔrɔ ni wɔɔrɔ ye.