Yeremi 6 - ALA KA KUMA

Zeruzalɛmu halakiko

¹ «Bɛnzamɛn kɔmɔgɔw, aw ye boli ka bɔ Zeruzalɛmu kɔnɔ! Aw ka buru fiyɛ Tekowa, ka taamasiɲɛ dɔ wili sanfɛ ka lɔ Bɛtikɛrɛmu kunna! Bari bɔnɛ bena bɔ kɔgɔdugu ɲafan fɛ, halakiliba lo.

² Ee! *Siyɔn, duguɲuman nin, a ta cɛnna.

³ Masacɛ dɔw be nan'a kama n'u ka kɛlɛdenw ye. U y'u ka fanibuguw lɔ k'a lamini. Bɛɛ be sigi a sagolayɔrɔ la.

⁴ «Aw k'aw yɛrɛ labɛn a kama! Aw ye wili an ka ta'a kɛlɛ tilegwan fɛ! Ee! An kunna man di, tile be banna kelen, dibi be donna!

⁵ Aw ye wili an ka ta'a kɛlɛ sufɛ, k'a ka bonɲumanw ci!»

⁶ Masaba, Setigi b'a fɔra ko: «Aw ka yiriw tigɛ ka yɛlɛyɔrɔw dilan Zeruzalɛmu kama. Dugu lo min ka kan ni ɲagwan ye, tɔɲɔli dɔrɔn lo b'a kɔnɔ.

⁷ Jii be bɔ jibɔyɔrɔ la cogo min na, a ka juguya be kɛ ten. Fariya ni cɛnni dama kibaru le be mɛn a faan bɛɛ la. Tuma bɛɛ ne ɲaa be tɔɔrɔ ni jolidaw le ye.

⁸ Zeruzalɛmu, sɔn ladili ma, n'o tɛ, ne bena n kɔɔ di i ma, k'i kɛ kasiyɔrɔ ye, mɔgɔ te se ka sigi yɔrɔ min na.»

Tulogwɛlɛnw halakiko

⁹ Masaba, Setigi ko: «Isirayɛli tɔɔ min tora, u bena olu fɛfɛ i ko mɔgɔ be *ɛrɛzɛn fɛfɛ cogo min na a tigɛtuma na. I bolo bɔ tugu ka fɛfɛli kɛ i ko mɔgɔ min be ɛrɛzɛn fɛfɛ.»

(Zeremi be kumana)

¹⁰ Ne ka kan ka kuma jɔn le fɛ k'a lasɔmi? Jɔn be sɔn ka ne lamɛn? U tulo gwerennin lo, u te se ka mɛnni kɛ. U be yɛlɛ Masaba ka kuma na, a nigɛ dɔɔni yɛrɛ t'u la.

¹¹ Masaba ka dimi be ne dusu la haali, ne te sera k'a muɲu tugu. «O dimi bɔ denmisɛnw na bɔlɔn kɔnɔ, ani kanbelenw ka jɛnkulu la. Cɛɛw ni musow bena minɛ a la, cɛkɔrɔbaw, sijantigiw bena minɛ a la.

(Ala be kumana)

¹² U ka soow, u ka forow n'u ka musow bena kɛ mɔgɔ wɛrɛw ta ye, tuma min na n bena n bolo wili jamanadenw kama. Ne Masaba le ko ten.

¹³ Denmisɛn ni mɔgɔkɔrɔbaw bɛɛ b'u ka tɔnɔ dɔrɔn le ɲinina. Kiraw ni sarakalasebagaw bɛɛ be namara le kɛ.

¹⁴ U ma u dɔgɔ don ne ka mɔgɔw ka tɔɔrɔko la. U tora k'a fɔ ko: ‹Hɛrɛ o hɛrɛ.› K'a sɔrɔ hɛrɛ te yen.

¹⁵ O tun ka ɲi ka maloya u ka kɛwalijuguw kosɔn, nga u ma maloya haali dɔɔni, u te maloya lɔn tugu. O kama, u bena kɛ halakininw cɛma, u bena u yɛrɛ sɔrɔ duguma, tuma min na ne bena u ɲaa gwan.» Masaba le ko ten.

¹⁶ Masaba ko: «Aw ye lɔ siraw kan ka filɛli kɛ. Aw ka ɲiningali kɛ sirakɔrɔw koo la. Aw ye siraɲuman ɲini k'ale taama, aw bena lafiya sɔrɔ. Nga u y'a fɔ ko: ‹An tena ale ta.›

¹⁷ Ne ye kɔlɔsilikɛbagaw bila aw ye k'aw lasɔmi: Aw k'aw tulo malɔ buru fiyɛkan na! Nga aw y'a fɔ ko: ‹An tena an tulo malɔ.›

¹⁸ O kama, aw siya wɛrɛw k'aw tulo malɔ. Jama, aw k'a lɔn fɛɛn min bena u sɔrɔ.

¹⁹ Diɲɛ mɔgɔw bɛɛ k'a mɛn: Ne bena bɔnɛ lase siya nin ma u ka miirijuguw kosɔn. Bari u ma sɔn ka mɛnni kɛ ne ka kuma la, u banna ne ka sariya la.

²⁰ Ne bena mun kɛ n'o ka wusulanw ye? Minw bɔra Saba jamana la, ani yiri kasadiman min be bɔ jamanajan la. Aw ka saraka jɛnitaw man di ne ye fewu, aw ka sarakaw te n dusu diya.»

²¹ O kama, Masaba ko: «N bena sentalonfɛnw bila u ɲa, faaw n'u deenw bena talon o la ɲɔgɔn fɛ, ni sigiɲɔgɔnmanw ani terimanw. U bena halaki.»

Halakilikɛla be sira kan

²² Masaba ko: «Siya dɔ natɔ filɛ nin ye ka bɔ kɔgɔdugu ɲafan fɛ. Siyaba lo, u wilila ka bɔ diɲɛ daan na.

²³ Kalaw ni tamanw b'u bolo, u ka fari, u te hinɛ fewu. U mankan be i ko jiba ta, u yɛlɛnin be soow kan. U jɛnnin be i ko mɔgɔ kelen, u labɛnnin lo ka na e *Siyɔn kɛlɛ.»

(Jama be kumana)

²⁴ An y'o kibaru mɛn, an fari bɛɛ fagara. Dusukasi y'an sɔrɔ, an be tɔɔrɔla i ko tintɔ.

²⁵ Aw kana bɔ ka taga kongo la, aw kana taga siraw kan dɛ. Bari muruw be aw juguw fɛ, mɔgɔw jaa be tigɛ faan bɛɛ.

(Ala be kumana)

²⁶ «Ne ka mɔgɔw, aw ka dusukasifani don aw kanna, ka kolonkolon bugurigwɛ kɔnɔ. Aw ka sanga kɛ i ko mɔgɔ min dencɛ kelen le sara. Aw ye kasi kosɔbɛ bari yanni dɔɔni an halakibagaw bena na».

Isirayɛli ye nigɛ tɔnɔtan ye (Ala be kumana)

²⁷ «Zeremi, ne y'i kɛ i ko nigɛ sɛgɛsɛgɛbaga, i ka ne ka mɔgɔw sɛgɛsɛgɛ, waasa k'u ka kɛwaliw lɔn.»

(Zeremi be kumana)

²⁸ U bɛɛ kɛra mɔgɔmurutininw yɛrɛ le ye, u be galon la mɔgɔ kan k'a tɔgɔ cɛn. U dusu be i ko zira, ani nigɛ, u bɛɛ ye cɛnnikɛlaw ye.

²⁹ Numu ka tafiyɛnan be nigɛ fiyɛra waasa k'a gwan k'a nɔgɔ bɔ. Numucɛ be nigɛ yelen ko a b'a nɔgɔ bɔ, a ka baara be kɛ gwansan, a nɔgɔ tena bɔ ka ye.

³⁰ U tɔgɔ le ko Warigwɛ nafabali. Bari, u kɛra nafabaliw ye Masaba fɛ.